क्रिकेटवर सट्टा, राष्ट्रवादी काँग्रेसच्या नगरसेवकाला अटक

क्रिकेटवर सट्टा लावल्याप्रकरणी राष्ट्रवादी काँग्रेसचे नगरसेवक जावेद शेख यांना अटक करण्यात आली आहे.

पिंपरी : पिंपरी-चिंचवडमध्ये क्रिकेटवर सट्टा लावल्याप्रकरणी महापालिकेचे राष्ट्रवादी काँग्रेसचे नगरसेवक जावेद शेख यांना अटक करण्यात आली आहे. तामिळनाडू प्रीमिअर लीग या क्रिकेट स्पर्धेवर सट्टा लावण्यात आला होता. निगडी पोलिसांनी जावेद शेख यांच्यासह 5 जणांना अटक केली आहे. सट्ट्यासाठी वापरण्यात येणारं साहित्य, लॅपटॉप, मोबाइल आणि 53,500 रुपये रोकड असा एकूण 2 लाख 77 हजारांचा मुद्देमालही जप्त करण्यात आला आहे. चिखलीतील मित्तल इमारतीतील एका फ्लॅटमध्ये हा सट्टा सुरू होता. दरम्यान, प्रकरणी पाच जणांना अटक करुन पोलिसांनी त्यांच्याविरोधात गुन्हाही दाखल करण्यात आला आहे.