Buldhana Loksabha : 'जाधवांच्या' विजयापेक्षा 'तुपकरांच्या' पराजयाचीच चर्चा, दोन्ही विरोधी उमेदवारांना घाम फोडला

Buldhana Loksabha : बुलढाणा लोकसभा मतदारसंघात शिवसेना शिंदे गटाचे प्रतापराव जाधवांनी चौथ्यांदा विजय संपादन केला आहे. या लढतीत त्यांनी महाविकास आघाडीचे उमेदवार नरेंद्र खेडेकर यांचा 29 हजार मतांनी पराभव केला आहे.

Photo Credit - abp majha reporter

Buldhana Loksabha : बुलढाणा लोकसभा मतदारसंघात शिवसेना शिंदे गटाचे प्रतापराव जाधवांनी चौथ्यांदा विजय संपादन केला आहे. या लढतीत त्यांनी महाविकास आघाडीचे उमेदवार नरेंद्र खेडेकर यांचा 29 हजार मतांनी पराभव केला आहे. मात्र या मतदार संघात प्रतापरावांच्या विजयापेक्षा अपक्ष उमेदवार रविकांत तुपकरांच्या पराजयाची चर्चा होत आहे. या मतदारसंघात 10 अपक्ष उमेदवार निवडणूक रिंगणात होते. पहिल्यांदाच दोन प्रादेशिक पक्षांच्या उमेदवारासह अपक्ष उमेदवार रविकांत तुपकर यांनीही तिहेरी लढत दिली. यामध्ये या उमेदवाराने बुलढाण्याच्या इतिहासात पहिल्यांदाच तब्बल 2 लाख 49 हजार 963 मते मिळविली. या माध्यमातून मताधिक्याचा विक्रम नोंदविला असून विजयी आणि पराभूत दोन्ही उमेदवारांना मिळालेल्या मतांच्या संख्येवर त्यांचा परिणाम दिसून आला. बुलढाणा येथील शेतकरी रहिवासी रविकांत तुपकर हे स्वाभिमानी शेतकरी संघटनेच्या माध्यमातून चळवळीशी जुळलेले आहेत.

रविकांत तुपकर यांनी लोकसभा निवडणूक लढविण्याचा निर्णय घेतला. महाविकास आघाडीकडून त्यांनी उमेदवारी मिळविण्याचा प्रयत्न केल्याची चर्चा झाल्याची उमेदवार निश्चित होण्याच्या आधी राजकीय वर्तुळात सुरू होती. मात्र, ठाकरेंनी उमेदवार घोषित केल्यानंतर रविकांत तुपकर यांनी अपक्ष म्हणून निवडणूक लढविण्याचे ठरविले आणि उमेदवारी अर्ज दाखल केला. ते अर्ज मागे घेणार असल्याची कुजबूजही संपूर्ण जिल्ह्यात त्यावेळी सुरू होती. मात्र, त्यांनी आपला उमेदवारी अर्ज कायम ठेवत थेट लोकसभा निवडणूक रिंगणात उडी घेतली. त्यांच्यामुळे दुहेरी लढतीचे तिहेरी लढतीत रूपांतर झाले आणि निकालाअंती त्यांना पराभव पत्करावा लागला. मात्र, त्यांनी बुलढाणा लोकसभा मतदारसंघाच्या इतिहासात नोंद करता येतील, असे मताधिक्य गाठल्याने आश्चर्य व्यक्त होत आहे.

प्रतापराव जाधव यांना घाटाखालील खामगाव आणि जळगाव जामोद या मतदारसंघाने प्रचंड मताधिक्य दिले, एवढे की त्या आधारावरच ते विजेते ठरले. होमग्राउंड असलेल्या मेहकर विधानसभेत त्यांची नरेंद्र खेडेकर आणि रविकांत तुपकर यांच्याशी फाईट झाली. शेवटी 243 मतांची नरेंद्र खेडेकर निसटती आघाडी मिळवली. मेहकर विधानसभेत तिसऱ्या क्रमांकावर राहिलेले तुपकर नरेंद्र खेडेकर यांच्यापेक्षा केवळ 79 मतांनी मागे होते. प्रतापराव जाधव आणि रविकांत तुपकर यांच्यात मेहकर विधानसभेत केवळ 322 मतांचे अंतर राहिले. सिंदखेडराजा विधानसभा मतदारसंघाने रविकांत तुपकर यांना भरभरून आशीर्वाद दिले. तुपकर यांनी सिंदखेडराजा विधानसभेत तब्बल 74 हजार 753 मते घेत प्रतापराव जाधव यांच्यावर 29 हजार 989 मतांची आघाडी घेतली. मात्र रविकांत तुपकर खामगाव आणि जळगाव जामोदमध्ये खूप मागे पडले. बुलडाणा विधानसभा मतदारसंघातही रविकांत तुपकर तिसऱ्या क्रमांकावर राहिले. त्यामुळे या मतदार संघात प्रतापरावांच्या विजयापेक्षा अपक्ष उम्मेदवार रविकांत तुपकरांच्या पराजयाची जास्त चर्चा होत आहे.

जाधव यांची प्रतिष्ठा अन् खेडेकराचे भवितव्य

2009, 2014 आणि 2019 अशा सलग तीन निवडणुकांमध्ये बाजी मारून खासदार जाधव जिल्ह्याचे मोठे नेते झाले. मात्र चौथी लढत त्यांच्यासाठी निर्णायक आणि भावी राजकारणाची दिशा ठरविणारी ठरली. ‘अँटी इन्कबन्सी’, बंडखोरीमुळे लागलेला डाग, मतदारांची व्यापक नाराजी, भाजपाची दावेदारी, वंचितचा कमकुवत उमेदवार, यामुळे यंदाची लढत त्यांच्यासाठी अग्निपरीक्षा ठरली. मात्र, अनुभव, नियोजन, अचूक व्यूहरचना या त्रिसूत्रीने त्यांनी यावर मात केली. यामुळे ते विजयाच्या शर्यतीत खंबीरपणे टिकून राहिले. यंदाचा विजय त्यांना आणखी मोठा करणारा आणि ‘दिल्लीत मोठी संधी’ देणारा ठरला आहे. तसेच जिल्ह्यातील शिंदे गटावर त्यांचेच प्रभुत्व कायम ठेवणारा राहिल.

इतर महत्वाच्या बातम्या