परभणी प्रकरणातील मृत सोमनाथ सूर्यवंशीला न्याय द्या, भीमसैनिकांवरील खोटे गुन्हे मागे घ्या, सचिन खरातांनी दिला आंदोलनाचा इशारा
परभणी प्रकरणातील मृत सोमनाथ सूर्यवंशीला न्याय द्यावा, अन्यथा पुढच्या दोन दिवसात आंदोलन करणार असल्याचा इशारा रिपब्लिकन पार्टी ऑफ इंडियाचे राष्ट्रीय अध्यक्ष सचिन खरात यांनी दिला आहे.
Sachin Kharat : परभणी प्रकरणातील मृत सोमनाथ सूर्यवंशीला न्याय द्यावा, तसेच आंबेडकरी महिला वत्सला मानवते यांचा पोलिसांनी विनयभंग करून बेदम मारहाण केली होती, त्यांनाही न्याय द्यावा, अन्यथा दोन दिवसात आंदोलन करणार असल्याचा इशारा रिपब्लिकन पार्टी ऑफ इंडियाचे राष्ट्रीय अध्यक्ष सचिन खरात यांनी दिला आहे. तसेच अनेक भीमसैनिकांवर खोटे गुन्हे दाखल केले आहेत, ते अजूनपर्यंत मागे घेतलेले नाहीत, ते तात्काळ मागे घ्यावेत अशी मागणी खरात यांनी केली आहे.
भीमसैनिकांवर दाखल केलेले खोटे गुन्हे मागे घ्यावेत
परभणीमध्ये संविधानाच्या प्रतिकृतीची समाजकंटकाने विटंबना केली होती. त्यानंतर भीमसैनिकांनी परभणी बंदची घोषणा केली होती. यादरम्यान तीव्र आंदोलन झाले होते, यावेळी पोलीस अधिकाऱ्यांनी घरात घुसून कोंबिंग ऑपरेशन करत युवकांना आणि महिलांना बेदम मारहाण केली होती. तसेच अनेकांना अटकही करण्यात आली होती. या ऑपरेशन दरम्यान मोठ्या प्रमाणावर घरांचे आणि गाड्यांचे देखील नुकसान झाले होते. यावेळी आंबेडकरी महिला वत्सला मानवते यांचा पोलिसांनी विनयभंग करून बेदम मारहाण केली होती. तसेच सोमनाथ सूर्यवंशी या युवकाचा न्यायालयीन कोठडीमध्ये मृत्यू झाला होता. या प्रकरणांमध्ये अजूनपर्यंत पोलिस अधिकाऱ्यांवर ॲट्रॉसिटी आणि मनुष्यवधाचा गुन्हा दाखल झाला नाही. तसेच खोटे गुन्हे भीमसैनिकांवर दाखल केले आहेत, ते अजूनपर्यंत मागे घेतलेले नाहीत. हे सर्व गुन्हे तात्काळ मागे घ्यावेत. तसेच अधिकाऱ्यांवर कारवाई करुन न्याय द्यावा असे खऱात म्हणाले. अन्यथा 2 दिवसानंतर तीव्र आंदोलन करण्याचा इशारा सचिन खरात यांनी दिला आहे.
परभणी येथील घटनेचा निषेध व्यक्त करण्यासाठी बीडमध्ये मोर्चा
परभणी येथील घटनेचा निषेध व्यक्त करत, बीडमध्ये आंबेडकरवादी संघटनेच्या वतीने, संविधान बचाव जनआक्रोश मोर्चाचे आयोजन करण्यात आले आहे. या मोर्चाला बीड शहरातील डॉ.बाबासाहेब आंबेडकर पुतळ्यापासून सुरुवात झाली असून हा मोर्चा जिल्हाधिकारी कार्यालयावर धडकणार आहे. या मोर्चाच्या माध्यमातून, सोमनाथ सुर्यवंशीच्या हत्येस जबाबदार पोलीसांवर गुन्हे दाखल करा, डॉ. बाबासाहेब आंबेडकरांचा अपमान करणारे गृहमंत्री अमित शाह यांची मंत्री मंडळातुन हकालपट्टी करा, परभणी येथील महिलांवर अमानुष लाठीचार्ज करणाऱ्या पोलीसांवर गुन्हे दाखल करा, देशातील सर्व निवडणूका मतपत्रिकेवर घ्या, शासकिय नोकरीतील गुत्तेदारी पध्दती रद्द करुन कायमस्वरुपी नौकरी द्या आणि रिक्त असलेल्या राखीव जागा त्वरीत भरा, मागासवर्गीय विद्यार्थ्यांना मिळणारी भारत सरकार शिष्यवृत्ती दरमहा वेळेवर द्या, शासकिय सेवेतील आरक्षणामधील वगर्गीकरण कायदा रद्द करा, शिक्षणाचे राष्ट्रीयकरण करा. या प्रमुख मागण्या करण्यात येत आहेत.
महत्त्वाच्या बातम्या
ट्रेंडिंग न्यूज
