Nashik News : मोक्कार थंडी! निफाड आजही पाच अंशावर, तर नाशिकचा पाराही घसरला
Nashik News : निफाडचा पारा आजही 5 अंशावर जैसे थे असून नाशिकमध्ये पारा घसरून 7.6 अंशावर पोहचला आहे.
Nashik News : आज पुन्हा नाशिकच्या (Nashik) तापमानात घट होऊन पारा दोन अंशांनी घसरला आहे. तर नाशिक कॅलिफोर्नियात आजही पाच अंश तापमानाची नोंद करण्यात आली आहे. आज नाशिक शहरात 7.6 अंश सेल्सिअस तापमानाची नोंद करण्यात आली तर निफाडमध्ये (Niphad) आज पुन्हा 5 अंश सेल्सिअस तापमान (Temperature) नोंदविण्यात आले आहे.
गेल्या काही दिवसांपासून हवेत गारठा असल्याने सकाळी नऊपर्यंत घराबाहेर निघणे कठीण झाल्याचे चित्र आहे. अशातच आज पुन्हा पारा खाली गेल्याने नाशिकसह जिल्ह्याला हुडहुडी भरली. नाशिक शहरासह जिल्ह्यात थंडीचा कडाका वाढला असून मागील चार ते पाच दिवसांपासून हुडहुडीने वेढा घातला आहे. ढगाळ वातावरणाने काढता पाय घेतल्यानंतर आता थंडीचे आगमन झाले असून किमान तापमानाबरोबरच कमाल तापमानातही घसरण झाली आहे.तर सकाळच्या सुमारास थंड वाऱ्यांमुळे दिवसाही नागरिकांना थंडीचा सामना करावा लागत आहे. त्यामुळे सकाळी नऊ वाजेपर्यंत घरातून बाहेर निघणे कठीण झाले आहे. सकाळी आठ वाजेला निघणारे नोकरदार वर्गही नऊ वाजेला घराबाहेर पडत असल्याचे चित्र आहे. दिवसभर स्वेटर आणि रात्री शेकोटीचा आधार नागरिक घेत आहेत.
नाशिकमध्ये काल 8.7 अंश तापमानाची नोंद करण्यात आली तर पारा घसरून 7.6 अंशावर पोहचला आहे. तर जिल्ह्याचा कॅलिफोर्निया म्हणून ओळख असलेल्या निफाडला कालच यंदाच्या हंगामातील सर्वात निचांकी तापमानाची नोंद करण्यात आली असताना आजही 5 अंशावर पारा जैसे थे आहे. दरम्यान थंडीची सुरुवात झाल्यानंतर नोव्हेंबर आणि डिसेंबर या दोन महिन्यात बोचरा थंडीचा अनुभव नाशिककरांनी घेतला. मात्र मागील काही दिवसांपासून किमान तापमान वाढले असले तरी कमाल तापमानात मात्र घसरण पाहायला मिळत होती. म्हणजेच सकाळी नऊ वाजेपर्यंत हवेत गारवा असल्याने नाशिककरांना हुडहुडी भरली आहे. दिवसाही असलेल्या शीतलहरींमुळे वातावरणात गारवा जाणवत आहे, शिवाय शहरासह जिल्ह्याचे तापमान दोन दिवसांपासून चांगलेच घसरले असून बोचऱ्या थंडीचा अनुभव नाशिककरांना मिळत आहे. त्यामुळे सकाळपासून घातलेला स्वेटर दिवसभरही परिधान करावा लागत आहे.
निफाड नीचांकी तापमानाची नोंद
तीन दिवसांपूर्वीपर्यंत नाशिकमधील 15.4 अंश सेल्सिअसपर्यंत नोंदवले गेले होते. तर रविवारी हेच तापमान 13.0 अंश सेल्सिअस नोंदवले गेले असताना सोमवारी म्हणजेच काल त्यात पाच अंशांची घसरण झाली. त्यामुळे हे तापमान 8.7 अंश सेल्सिअस नोंदवले गेले. तर आज पुन्हा एका अंशाने तापमान घसरले आहे. दरम्यान निफाडच्या पारा काल अचानक घसरल्यानंतर आज पुन्हा पाचच अंशावर पारा थांबला आहे. आजही निफाचं कुंदेवाडी गहू केंद्रात 5 अंश सेल्सिअस तापमानाची नोंद करण्यात आली आहे. तर नाशिक 7.6 अंश तापमानाची नोंद करण्यात आली आहे. दरम्यान हवेत गारवा असल्याने प्रचंड थंडी जाणवत असल्याचे चित्र आहे.
सर्दी, खोकला वाढला...
गेल्या तीन ते चार दिवसांपासून शहर परिसरात हवेत गारवा वाढला असल्याने शहरात सर्दी खोकल्याचे रुग्ण वाढले आहेत. त्यामुळे क्लिनिकला गर्दी वाढत असून थंडीसह गारवा वाढल्याने सर्दी तापाचे रुग्ण आढळून येत असल्याचे डॉक्टरांचे म्हणणे आहे. बदलत्या वातावरणामुळे तापमानात घसरण होत असून आरोग्याच्या तक्रारीत वाढ झाली आहे. यासाठी घराबाहेर पडताना उबदार कपडे, पाणी पिताना कोमट पाण्याचा वापर करावा, सार्वजनिक ठिकाणी जाताना मास्कचा वापर करावा असे आवाहन डॉक्टरांकडून देण्यात येत आहेत.
महत्त्वाच्या बातम्या
