चोरीचा पॅटर्न बदलला, नागपुरात मासिक वेतन घेऊन चोरी करणाऱ्या कॉर्पोरेट चोर जेरबंद

शंका येऊ नये म्हणून त्यांच्या मदतीसाठी दहा अणि बारा वर्षीय दोन मुलं सुद्धा पाठविण्यात आली होती. नागपूरातील नेताजी मार्केटमधून मोबाईल चोरीच्या प्रकरणात आफताब इब्रार अन्सारी याला ताब्यात घेतलं आणि तिथून त्याच्या इतर साथीदारांची माहिती मिळाली.

नागपूर  : पगारी नोकरांबद्दल तुम्ही आम्ही सर्वांनीच ऐकलंय. पैसे घेऊन काम करणाऱ्यांचीही आपल्याला माहिती आहे. मात्र, नागपूरमध्ये पगार घेऊन चोरी करणाऱ्या चोरट्यांना नागपूर पोलिसांनी जेरबंद केलं आहे. या पगारदार चोरांमुळं नागरिकांसह पोलीस देखील चक्रावले आहेत. बाजार आणि गर्दीच्या ठिकाणी मोबाईल चोरी करणारी एक टोळी नागपूर शहरात गेल्या काही दिवसांपासून सक्रिय होती. नागपूर पोलिसांनी या टोळीचा पर्दापाश केला आहे. अमरजीतकुमार महतो, विशालकुमार महातो, धर्मेंद्रकुमार मंडल, भोला महतो, आस्तिक घोष, नंदकुमार चौधरी, आणि आफताब इब्रार अंसारी अशी अटकेतील आरोपींची नावं आहेत. झारखंड मध्ये राहणाऱ्या ह्या टोळीच्या म्होरक्याने एकदम कॉर्पोरेट स्टाईल चोरीचा उद्योगच नागपुरात उघडला होता. चोरीच्या कामानुसार 5000 ते 15000 महिना असा पगार या चोरांना मिळत होता. त्या बरोबर या चोरांच्या राहण्याची आणि जेवणाची ही व्यवस्था करण्यात आली होती.  हे चोरटे बाजार आणि गर्दीच्या ठिकाणी मोबाईल लंपास करायचे. त्यानंतर चोरलेले मोबाईल ते झारखंडमध्ये पाठवून देत होते. तिथून थेट बांगलादेशात मोबाईलची तस्करी केली जायची. शंका येऊ नये म्हणून त्यांच्या मदतीसाठी दहा अणि बारा वर्षीय दोन मुलं सुद्धा पाठविण्यात आली होती. नागपूरातील नेताजी मार्केटमधून मोबाईल चोरीच्या प्रकरणात आफताब इब्रार अन्सारी याला ताब्यात घेतलं आणि तिथून त्याच्या इतर साथीदारांची माहिती मिळाली. ही टोळी पकडली गेली असली, तरी या झारखंडचा म्होरक्‍याने अशा अनेक टोळ्या महाराष्ट्रात ठिकठिकाणी पाठवल्या असल्याची माहिती आहे. हा म्होरक्या झारखंडच्या तीन पहाड नावाच्या गावात राहणारा आहे. हा म्होरक्या 25 ते 30 वयोगटातील असल्याची माहिती आहे. शिवाय तो फार शिक्षित देखील नाही. मात्र त्याला मोबाईलबद्दल खूप माहिती आहे. तो स्वत: कधीच आपल्या या पगारी टोळी बरोबर फिरला नाही. त्यांच्याशी संपर्क करायचा असल्यास फोनचा वापर करावा लागत असल्याचे कळाले आहे. तसेच इथे चोरलेले मोबाईल घेऊन त्याला द्यायला  एका व्यक्तीची नेमणूक केली होती, अशी माहितीही मिळाली आहे.