ठाणे जिल्ह्यात दोन दुर्घटना; बदलापुरात वायु गळती तर भिवंडीत 15 गोदामं जळून खाक

ठाणे जिल्ह्यात गुरुवारी (3 जून) दोन दुर्घटना घटना घडल्या. बदलापूर एमआयडीसीमधील एका कंपनीतून वायु गळती झाल्याने एकच गोंधळा उडाला. तर भिवंडीत लागलेल्या आगाती भंगाराची 15 गोदामं जळून खाक झाली. सुदैवाने या दोन्ही घटनेत कोणतीही जीवितहानी झालेली नाही

Thane_Accident_Badlapur_Bhiwandi

ठाणे : मुंबईजवळच्या ठाणे जिल्ह्यात काल (3 जून) रात्री दोन मोठ्या दुर्घटना घडल्या. ठाण्यातील बदलापूरमध्ये एका कंपनीतून वायू गळती झाल्याने आजूबाजूच्या परिसरात एकच गोंधळ उडाला होता. हा वायू तीन किमीपर्यंतच्या परिसरात पसरल्याने श्वास घेण्यात अडचणी, डोळ्यांची जळजळ असे त्रास होऊ लागले. तर भिवंडी शहरात भंगाराच्या गोदामात लागलेल्या भीषण आग लागून 15 गोदामं जळून खाक झाली. सुदैवाने या दोन्ही घटनेत कोणतीही जीवितहानी झालेली नाही

भिवंडीत आगीचे सत्र सुरुच ; शहरातील अवचित पाडा परिसरात भंगारच्या गोदामाला भीषण आग 
भिवंडी शहरात अग्नितांडव सुरुच आहे. शहरातील अवचित पाडा परिसरात असलेल्या भंगार गोदामांना मध्यरात्रीच्या सुमारास अचानक भीषण आग लागली. या आगीत एकूण 15 भंगार गोदामे जळून खाक झाली आहेत. या भंगार गोदामात कापड, चिंध्या, पुठ्ठे, प्लस्टिक, तागे, पीओपी आणि इतर भंगार साहित्य मोठ्या प्रमाणात ठेवण्यात आले होते. आगीचे नेमकी कारण अजून समजले नसून या आगीत कोणत्याही प्रकारची जीवितहानी झालेली नाही. तसेच अग्निशमन दलाच्या तीन गाड्या घटनास्थळी दाखल झाल्या. दरम्यान या भंगार गोदामांच्या आजूबाजूला रहिवासी घरे आणि यंत्रमाग कारखाने असल्याने आग लागल्यामुळे परिसरात एकच गोंधळ उडाला होता. तसंच आगीच्या धुराने परिसरातील नागरिक हैराण झाले होते. मात्र अग्निशमन दलाच्या जवानांनी तब्बल चार तासांच्या अथक प्रयत्नानंतर या आगीवर नियंत्रण मिळवलं. परंतु शहरात वारंवार आगीच्या घटना घडत असल्याने या आगी लागतात की लावल्या जातात असा प्रश्न या ठिकाणी उपस्थित होत आहे.

बदलापूर एमआयडीसीत रासायनिक गॅसगळती, परिसरातील लोकांना श्वास घ्यायला त्रास
बदलापूर एमआयडीसीत गुरुवारी (3 जून) रात्री अकराच्या सुमारास रासायनिक कंपनीत गॅस गळती झाली. यामुळे शिरगाव, आपटेवाडी भागात अनेक लोकांना श्वास घ्यायला त्रास होऊ लागल्याने मोठी घबराट पसरली होती. बदलापूर एमआयडीसीत नोबेल इंटरमिडीएट्स नावाची रासायनिक कंपनी आहे. या कंपनीतील रिऍक्टरमध्ये काल रात्री 11 वाजण्याच्या सुमारास ही गॅस गळती झाली. या रिअॅक्टरमध्ये सल्फ्युरिक अॅसिड आणि मिथाईल बेंझाईन एकत्र केलं जात होतं. मात्र यात सल्फ्युरिक अॅसिड जास्त पडल्यानं अचानक रिअॅक्टरमधून गॅस लीक झाला आणि परिसरात पसरला. हा गॅस ज्वलनशील नसला, तरी त्यामुळे परिसरातल्या लोकांना श्वास घ्यायला त्रास होणं, डोळे जळजळणं असे त्रास होऊ लागले. याबाबतची माहिती मिळताच अग्निशमन दलाने घटनास्थळी धाव घेत ही गळती रोखली. तसंच रिअॅक्टरचं कुलिंग ऑपरेशन केलं. या घटनेत कुणालाही इजा झालेली नसून परिस्थिती पूर्णपणे नियंत्रणात असल्याची माहिती मुख्य अग्निशमन विभागाने दिली आहे.