Aryan Khan : आर्यन खानला मुंबई सत्र न्यायालयाचा मोठा दिलासा; एनसीबीनं जप्त केलेला पासपोर्ट आर्यनला परत देण्याचे निर्देश

Aryan Khan : एनसीबीनं जप्त केलेला पासपोर्ट आर्यन खानला परत देण्याचे निर्देश मुंबई सत्र न्यायालयाने दिले आहेत.

Aryan Khan

Cruise Drugs Case : क्रूझ ड्रग्स प्रकरणी क्लीन चिट मिळालेला बॉलिवूड अभिनेता शाहरुख खानचा (Shah Rukh Khan) मुलगा आर्यन (Aryan Khan) याने 30 जून रोजी विशेष एनडीपीएस कोर्टात आपला पासपोर्ट परत मिळावा यासाठी याचिका दाखल केली. याप्रकरणी न्यायालयाने एनसीबीला उत्तर दाखल करण्याचे निर्देश दिले. या प्रकरणाच्या सुनावणीसाठी 13 जुलैची तारीख निश्चित करण्यात आली होती. त्यानुसार आता आर्यन खानला मुंबई सत्र न्यायालयाचा दिलासा मिळाला आहे. एनसीबीनं जप्त केलेला पासपोर्ट आर्यन खानला परत देण्याचे निर्देश मुंबई सत्र न्यायालयाने दिले आहेत. 

कॉर्डिलिया क्रुझ ड्रग्ज प्रकरणात एनसीबीने शाहरुख खानचा मुलगा आर्यन खानला अटक केली होती. मात्र एसआयटीने दाखल केलेल्या आरोपपत्रात नाव वगळण्यात आल्यानं आर्यनला क्लीन चीट मिळाली होती. या प्रकरणातील तपासाशी आता कोणताच संबंध नसल्याने आर्यनला त्याचा पासपोर्ट परत करण्याचे एनसीबीला निर्देश देण्यात आले होते. त्यानुसार आर्यनला आता त्याचा पासपोर्ट परत मिळाला आहे. 

आर्यन खानने 30 जून रोजी पासपोर्ट परत मिळावा यासाठी विशेष न्यायालयात याचिका दाखल केली होती. आपल्या याचिकेत आर्यनने न्यायालयाला विनंती केली होती की, एनसीबीच्या आरोपपत्रात त्याचे नाव नाही, त्यामुळे त्याचा पासपोर्ट परत देण्यात यावा. या प्रकरणाबाबत विशेष न्यायालयाने एनसीबीला उत्तर दाखल करण्याचे निर्देश दिले होते. 

आर्यन खानला भोगावा लागला तुरुंगवास

मुंबईहून गोव्याला जाणाऱ्या कॉर्डिलिया क्रूझवर 3 ऑक्टोबर 2021 रोजी एनसीबीकडून मोठ्या प्रमाणात ड्रग्स जप्त करण्यात आले होते. त्यात सुपरस्टार शाहरुख खानचा मोठा मुलगा आर्यन खानसह त्याचा बालमित्र अरबाज मर्चंट आणि मुनमुन धमेचा यांच्यासह अन्य 20 जणांना अटक करण्यात आली होती. त्यानंतर आर्यनला बरेच दिवस तुरुंगात राहावं लागलं होतं. हे प्रकरण देशभरात गाजलं होतं. त्यानंतर आर्यन खानसह सहा जणांना क्लीनचिट मिळाली. 

संबंधित बातम्या