Ramdas Athawale : वाजवूया मविआचे बारा, मोदींच्या सभेत आठवलेंची भन्नाट कविता; उद्धव ठाकरेंसह शरद पवारांनाही टोला

Ramdas Athawale : रामदास आठवले यांनी नाशिकच्या सभेतून तुफान फटकेबाजी केली. उद्धव ठाकरे आणि शरद पवार यांना रामदास आठवलेंनी टोला लगावला.  

Narendra Modi, Ramdas Athawale, Uddhav Thackeray and Sharad Pawar

Source : ABP Majha

नाशिक : महाराष्ट्र विधानसभा निवडणूक 2024 ची (Maharashtra Assembly Elections 2024) रणधुमाळी सुरु झाली आहे. राज्यात महायुती (Mahayuti) आणि महाविकास आघाडीकडून (Mahavikas Aghadi) प्रचाराचा धुराळा उडालाय. आज पंतप्रधान नरेंद्र मोदी (PM Narendra Modi) यांची नाशिकमध्ये महायुतीच्या उमेदवारांच्या प्रचारासाठी सभा आयोजित करण्यात आली. या सभेतून केंद्रीय मंत्री रामदास आठवले (Ramdas Athawale) यांनी तुफान फटकेबाजी केली. तर शिवसेना ठाकरे गटाचे प्रमुख उद्धव ठाकरे (Uddhav Thackeray) आणि राष्ट्रवादी शरदचंद्र पवार गटाचे प्रमुख शरद पवार (Sharad Pawar) यांना रामदास आठवलेंनी टोला लगावला.  

रामदास आठवले म्हणाले की, वाढवायची आहे आपल्याला महाराष्ट्राची शान... साऱ्या देशाचे आहे नरेंद्र मोदींकडे ध्यान... महाराष्ट्र सुटलाय महायुतीचा वारा... नरेंद्र मोदींसाठी जमलाय जनसमुदाय सारा... देऊया भारत मातेचा नारा आणि वाजवूया मविआचे बारा, अशी भन्नाट कविता करत त्यांनी महाविकास आघाडीवर निशाणा साधला. 

आपली आर्थिक स्थिती चांगली 

ते पुढे म्हणाले की, विकास, विकास, विकास असा त्यांच्या जीवनाचा टप्पा आहे. मोदी आल्यानंतर गडकरींना रस्ते विभाग दिला आणि अनेक ठिकाणी रस्ते झाले. स्टेशनची रेल्वेची कनेक्टिविटी चांगली झाली आहे.  शेतकऱ्यांना मदत होत आहे.  लोकांना धान्य देण्यात येत आहे.  25 कोटी लोकं 10 वर्षात गरिबीवर आले आहेत.  आपण पुढील 5 वर्षात 3 वर येणार आणि त्यापुढील 5 वर्ष आम्हाला मिळाले तर 2 आणि त्यानंतर एकवर येणार, आपली आर्थिक स्थिती चांगली आहे, असेही रामदास आठवले म्हणाले.  

उद्धव ठाकरे, शरद पवारांना टोला

मविआवाले म्हणतात की, प्रगती नाही.  उद्धवजी आपण काय केलं?  मविआ हाय हाय, उद्धवजी आपण केलं काय? घरात बसा, काही हरकत नाही.  बाळासाहेब मला म्हणाले होते की, शिवशक्ती-भीमशक्तीसोबत आली पाहिजे.  मी ज्याचासोबत जातो त्यांचा विजय होतो, ज्यांच्या विरोधात जातो त्यांचा सत्यनाश होतो. उद्धवजी म्हणाले मी तिकडे जातो, मी म्हणालो जा, पण धनुष्यबाण इकडे येणार आहे. पवार साहेबांना म्हणालो, मी इकडे आलो तर तुम्ही तिकडे काय करता आहात. सोनिया गांधींनी पवारांना पंतप्रधान बनवलं नाही, पवारांवर अन्याय केला. आपण लोकसभेत विरोधी पक्षनेते असताना आम्ही आपल्यासोबत होतो.  तेव्हा सोनिया गांधींना बोललो की त्यांना संधी द्या. पण, तसं काही झालं नाही.  आम्ही आपल्याला सांगत होतो इकडे या, असे म्हणत रामदास आठवले यांनी उद्धव ठाकरे आणि शरद पवार यांना टोला लगावला. 

आणखी वाचा