जागतिक निविदा काढूनही मुंबईला लस मिळाली नाही तर ते अपयश केंद्राचे असेल: खासदार राहुल शेवाळे

मुंबई महापालिकेच्या जागतिक निविदासाठी अनेक कंपन्या प्रतिसाद देतील, पण केंद्र सरकारच्या परवानगी अभावी त्यांची अडवणूक होईल असा आरोप शिवसेना खासदार राहुल शेवाळे यांनी केला आहे.

mumbai_bmc_vaccination

मुंबई :  महानगरपालिकेने मुंबई शहरासाठी एक कोटी कोरोना लसींची जागतिक निविदा काढली आहे. आता त्यावरुनही राजकारण सुरु होण्याची शक्यता आहे. लसींसाठी जागतिक निविदा काढल्यानंतरही मुंबईला लस पुरवठा होणार का असा सवाल उपस्थित केला जातोय. जागतिक निविदा काढूनही मुंबईला लस मिळाली नाही तर ते अपयश केंद्राचे असेल असं शिवसेना खासदार राहुल शेवाळे यांनी म्हटलं आहे. 

मुंबई महापालिकेच्या जागतिक निविदासाठी जगभरातील अनेक कंपन्या उत्सुक असून त्या योग्य असा प्रतिसाद देतील. पण केंद्र सरकारच्या परवानगी अभावी त्यांची अडवणूक होईल असा आरोप शिवसेना खासदार राहुल शेवाळे यांनी केला आहे. त्यामुळे मुंबई महापालिकेच्या जागतिक निविदांचा उद्देश साध्य व्हायचा असेल तर त्याला केंद्राच्या सहकार्याची आवश्यक्ता आहे असंही ते म्हणाले. 

महापालिकेनं लसीसाठी जागतिक निविदा काढण्याचं काम केलं. ज्यावेळी त्याला कंपन्या प्रतिसाद देतील तेव्हा त्यांना परवानगी देण्याची जबाबदारी केंद्रसरकारची असल्याचं राहुल शेवाळे म्हणाले.  देशात फायझर, मॉडर्ना आणि इतर लसींना अजून परवानगी नाही. स्पुटनिक या रशियाच्या लसीचा साठा भारतात यापूर्वीच डॉ. रेड्डी फार्मा यांच्याकडे आलाय. मात्र, त्यांना डोमेस्टिक सप्लायचे लायसन्स नाही. हे लायसन्स मिळायला किमान 2 महिने लागतील असं त्यांनी सांगितलं. 

कोविशील्ड आणि कोवॅक्सिनचा पुरेसा पुरवठा करण्यास या आधीच कंपन्यांनी असमर्थता दाखवलीय. कोविशिल्डकडून 1 कोटी लसीचा पुरवठा महाराष्ट्र राज्याला होऊ शकतो. कोवॅक्सिन लसीचा दर महिन्याला केवळ 10 लाख पुरवठा होऊ शकतो. त्यामुळे या कंपन्यांकडूनही पुरेसा पुरवठा व्हायला हवा असं मत त्यांनी व्यक्त केलं. 

खासदार राहुल शेवाळेंच्या या आरोपाला उत्तर देताना भाजप नेते प्रसाद लाड म्हणाले की, "लोकांची दिशाभूल करण्यासाठी ग्लोबल टेंडरचा बागुलबुवा उभा केला जातोय. मुंबईत लस पुरवठा कमी पडणार नाही यासाठी केंद्रासोबत संपर्क साधून देवेंद्र फडणवीस प्रयत्न करतील. राज्यात, देशात आणि संपूर्ण जगात भारतातल्या कोवॅक्सिन, कोविशील्डची मागणी आहे. इथेच जर लसींचं उत्पादन, पुरवठा होत असेल तर ग्लोबल टेंडरच्या मागे का धावतायेत. शिवसेनेला फक्त केंद्रावर आरोप करण्याचं काम येतं."

मुंबई महापालिकेची जागतिक निविदा
मुख्यमंत्री उद्धव ठाकरे यांच्या परवानगीनंतर मुंबई महानगरपालिकेने मुंबई शहरासाठी एक कोटी कोरोना लसींची जागतिक निविदा काढली आहे. मुंबई महानगरपालिकेचे 60 ते 90 दिवसांच्या आत लसीकरण करण्याचे लक्ष्य आहे. मुंबई महानगरपालिका आयुक्त इकबालसिंग चहल यांनी ही माहिती दिलीय.

राज्य सरकार कोरोना लसीच्या थेट आयातीच्या शक्यतेवर विचार करत आहे, जेणेकरून जास्तीतजास्त लोकांना लसीकरण केलं जाईल, अशी माहिती पर्यावरण मंत्री आदित्य ठाकरे यांनी दिली होती. हे शक्य झाल्यास तीन आठवड्यांत मुंबईत सर्वांचं लसीकरण करण्याचा रोडमॅप असल्याचे त्यांनी सांगितले. याच पार्श्वभूमीवर आजची निविदा काढण्यात आली आहे. त्यामुळे येत्या काही दिवसांत मुंबईमधील लसीकरणाचा वेग वाढणार आहे.

महत्वाच्या बातम्या :