CNG Price Hike : सर्वसामान्यांना महागाईचा झटका, सीएनजीच्या दरात चार रुपयांची तर पीएनजीच्या दरात तीन रुपयांची वाढ
महानगर गॅस लिमिटेडने ( MGL) सीएनजीच्या (CNG Price Hike) दरात चार रुपयांची तर पीएनजीच्या (PNG) दरात तीन रुपयांची वाढ केली असून नवे दर आज मध्यरात्रीपासून लागू होतील.
मुंबई: आधीच वाढलेल्या महागाईने त्रस्त असलेल्या मुंबईकरांना आता पुन्हा एक झटका बसणार आहे. महानगर गॅस लिमिटेडने सीएनजी दरात पुन्हा एकदा वाढ करण्याचा निर्णय घेतला आहे. सीएनजीच्या दरात चार रुपयांची वाढ झाली आहे तर पीएनजीच्या दरात 3 रुपयांची वाढ करण्यात आली आहे. त्यामुळे मुंबईतील नागरिकांना आता सीएनजी 80 प्रति किलोने खरेदी करावा लागेल तर पीएनजीच्या दरातही वाढ होऊन तो 48.50 रुपये करण्यात आला आहे. स्थानिक पातळीवर गॅसच्या सप्लायमध्ये कमतरता निर्माण झाल्याने हा निर्णय घेण्यात आल्याचं महानगर गॅस लिमिटेडने (MGL) सांगितलं आहे. वाढलेले नवीन दर हे आज मध्यरात्रीपासून लागू करण्यात येणार आहेत.
महानगर गॅस लिमिटेडने यासंबंधी एक पत्रक जारी केलं आहे. देशांतर्गत गॅसच्या वाढलेल्या किमतीचा परिणाम एमजीएच्या उत्पादन किमतीवर होत असून, त्यामुळे सीएनजी आणि पीएनजीच्या किमतीमध्ये वाढ करण्याचा निर्णय घेण्यात आला आहे. सीएनजीच्या किमतीत चार रुपये तर पीएनजीच्या किमतीत तीन रुपयांची वाढ करण्यात आली आहे.
या आधी मुंबईमध्ये सीएनजीचे दर 29 एप्रिलमध्ये वाढलेले होते. त्यावेळी चार रुपयांनी सीएनजीच्या दरात वाढ करण्यात आली होती. त्यानंतर आज पुन्हा त्यामध्ये वाढ करण्यात आली आहे.
पेट्रोल-डिझेलचे दर स्थिर
देशातील पेट्रोल आणि डिझेलच्या दरात कोणताही बदल झाला नसून गेल्या 51 दिवसांपासून ते स्थिर आहेत. आंतरराष्ट्रीय बाजारात कच्च्या तेलाच्या किमतीत सातत्यानं चढ-उतार पाहायला मिळत आहे. सध्या कच्च्या तेलाच्या दरांत घट झाल्याचं पाहायला मिळत आहे. कच्च्या तेलाचे दर घटल्यामुळे देशातील पेट्रोल आणि डिझेलच्या किमतीही कमी होण्याची शक्यता वर्तवली जात आहे.
यापूर्वी 21 मे रोजी केंद्र सरकारनं पेट्रोल-डिझेलच्या किमती कमी करण्याची घोषणा केली होती. त्यानंतर पेट्रोल 9.50 रुपये आणि डिझेल रुपये स्वस्त होता. तेव्हापासून देशातील पेट्रोल-डिझेलचे दर स्थिर आहेत. त्यांच्यात कोणताही बदल करण्यात आलेला नाही.
आजचे कच्च्या तेलाचे दर
आंतरराष्ट्रीय बाजारातील आजच्या कच्च्या तेलाच्या किमतींवर नजर टाकली तर त्यात पुन्हा घसरण झाल्याचं पाहायला मिळत आहे. डब्ल्यूटीआय क्रूड आज प्रति बॅरल 1.38 डॉलरनं घसरल्यानंतर प्रति बॅरल 102.7 डॉलरच्या दरावर आहे. जागतिक तेल बेंचमार्क ब्रेंट क्रूड 1.21 डॉलरने घसरल्यानंतर प्रति बॅरल 105.9 डॉलरवर आहे.
महत्त्वाच्या बातम्या
ट्रेंडिंग न्यूज
