Tanaji Sawant : जोखीमग्रस्त गावे ओळखून त्वरित आरोग्य सुविधा द्या, साथ रोगाबाबत जनजागृती करा; आरोग्यमंत्री सावंतांच्या सूचना

Tanaji Sawant : पावसाळ्यात उद्भवणारे आजार आणि पूर परिस्थितीत तातडीने आरोग्य सुविधा उपलब्ध करुन देण्यासंदर्भात आरोग्यमंत्री तानाजी सावंत यांनी अधिकाऱ्यांची बैठक घेतली.

Minister Tanaji Sawant

Tanaji Sawant : जोखीमग्रस्त गावे ओळखून तिथे शीघ्र प्रतिसाद पथके सज्ज ठेवावीत. कर्मचाऱ्यांना प्रशिक्षण देण्यात यावे तसेच उद्रेक झाल्यास त्वरित आरोग्यविषय उपाययोजना करण्यात याव्यात अशा सूचना राज्याचे आरोग्यमंत्री तानाजी सावंत (Minister Tanaji Sawant) यांनी दिल्या आहेत. पूर्वतयारीसाठी जिल्हा स्तरावरील अहवाल रोजच्या रोज तयार करण्यात यावा. त्यावर बारकाईने लक्ष ठेवण्यात यावे. पिण्याच्या पाण्याचे स्तोत्र तपासून पाहावेत. तसेच  पाणी पिण्यास योग्य आहे किंवा नाही याची खात्री करावी अशा सचूना देखील सावंत यांनी अधिकाऱ्यांना केल्या आहेत. 

पावसाळ्यात उद्भवणारे आजार आणि पूर परिस्थितीत तातडीने आरोग्य सुविधा उपलब्ध करुन  देण्यासाठी आरोग्य विभागाने जिल्हा पातळी आणि गाव पातळीपर्यंत केलेल्या आरोग्यसेवा तयारीचा आरोग्यमंत्री डॉ. तानाजी सावंत यांनी आढावा घेतला. त्यानंतर ते बोलत होते. या बैठकीला आरोग्य विभागाचे अतिरिक्त मुख्य सचिव मिलिंद म्हैसकर, आरोग्य सेवा आयुक्त धीरज कुमार, संचालक डॉ. नितीन अंबाडेकर आदी उपस्थित होते.

पुरेसा औषधसाठा उपलब्ध ठेवण्यात यावा

जिल्ह्यातील समनव्यक अधिकाऱ्यांच्या दूरध्वनी क्रमांकाची यादी तयार करुन ती प्रत्येक जिल्ह्याच्या ठिकाणी अद्ययावत ठेवावी. राज्य स्तरावरही पाठवावी. साथरोग नियंत्रणासाठीच्या किट वाटप करण्यात याव्यात. तसेच त्याचा अहवाल तयार ठेवावा. आशाताई आणि आरोग्य कर्मचारी यांच्या याद्यासुद्धा जिल्हा आरोग्य अधिकारी यांच्याकडे ठेवण्यात याव्यात असे सावंत म्हणाले. डास उत्पत्ती ठिकाणे यावरही लक्ष द्यावे तसेच पाणीसाठे चांगले राहतील यावरही लोकसहभागाद्वारे  नियंत्रण ठेवावे. शीघ्रकृती पथकाद्वारे करावयाचे कामे  तसेच इतर सूचनांसाठी एक पुस्तिका तयार करण्यात यावी. कर्मचाऱ्यांना मार्गदर्शक सूचना देण्यात याव्यात. पुरेसा औषधसाठा उपलब्ध ठेवण्यात यावा. ग्रामपंचायत, नगरपंचायत येथे साथ रोगाबाबतची माहिती देण्यासाठी फलक लावण्यात यावेत, अशा सूचना यावेळी आरोग्यमंत्री सावंत यांनी  केल्या. 

साथ रोगाबाबत जनजागृती करावी

साथ रोगाबाबतची माहिती लोकांपर्यंत जाण्यासाठी व्यापक जनजागृती करण्याच्या सूचना अतिरिक्त मुख्य सचिव म्हैसकर यांनी दिल्या. कठीण परिस्थितीत आरोग्य विभाग चांगली जबाबदारी पार पाडत असून पावसाळ्यातील आरोग्य परिस्थितीही व्यवस्थितपणे हाताळण्यास सर्वांनी सक्रिय रहावे, असेही यावेळी त्यांनी सांगितले. 
या बैठकीस आरोग्य विभागातील विभागीय आरोग्य उपसंचालक, जिल्हा शल्य चिकित्सक, जिल्हा आरोग्य अधिकारी दूरदृष्य प्रणालीद्वारे उपस्थित होते.

आजारांना प्रतिबंधासाठी जोखीमग्रस्त गावांची यादी तयार 

आरोग्य विभागामार्फत पावसाळ्यातील डेंगू, मलेरिया, जापानी मेंदूजवर, लेप्टोस्पायरोसिस या आजारांना प्रतिबंधासाठी जोखीमग्रस्त गावांची यादी तयार करण्यात आली आहे.  गृहभेटी आणि आरोग्य कर्मचाऱ्यांमार्फत सर्वेक्षण व रुग्णशोध मोहीम हाती घेण्यात आली आहे. आश्रम शाळा यांना वैद्यकीय अधिकारी, कर्मचारी यांच्या मार्फत नियमित भेटी देण्यात येत आहेत. पाणी गुणवत्ता नियंत्रण 76 हजार पाणी नमुने तपासण्यात आले आहेत. पाण्याच्या स्रोतांचे सर्वेक्षण करुन प्रत्येक गावांना हिरवे, पिवळे, लाल कार्ड देण्यात आले आहेत.

महत्त्वाच्या बातम्या: