कोविड रुग्णांना टरबुजातून खर्रा तर पार्सलमधून मद्य पाठवण्याचा नातेवाईकांचा प्रयत्न, यवतमाळमधील रुग्णालयातील प्रकार
शौकिनांची 'तल्लफ' भागवण्यासाठी टरबुजातून खर्रा तसंच फळंचा ज्युस असल्याचं भासवून पार्सलमधून विदेशी मद्य पाठवण्याचा रुग्णांच्या नातेवाईकांनी केला. यवतमाळच्या वसंतराव नाईक शासकीय वैद्यकीम महाविद्यालयात हा प्रकार समोर आला. पंरतु रुग्णालय प्रशासनाने त्यांचा हा प्रयत्न हाणून पाडला.
यवतमाळ : यवतमाळच्या वसंतराव नाईक शासकीय वैद्यकीय महाविद्यालयात कोविडच्या उपचारासाठी दाखल असलेल्या रुग्णांना त्यांच्याच नातेवाईकांकडून खर्रा तसंच मद्य पाठवण्याचा प्रयत्न होत असल्याचं समोर आलं आहे. परंतु वैद्यकीय महाविद्यालयात तैनात असलेले सुरक्षारक्षक आणि डॉक्टर यांच्या सतर्कतेने संबंधित प्रकार उघडकीस आला.
या शौकिनांनी तल्लफ भागवण्यासाठी नातेवाईकांनी अनोखी शक्कल लढवली. रुग्णाच्या नातेवाईकांनी चक्क टरबुजातून खर्रा पार्सल पाठवण्याचा प्रयत्न केला. इतकंच नाही तर काही जणांनी रुग्णांना विदेशी मद्य सुद्धा पुरवण्याचा प्रयत्न केला.
रुग्णाला विदेशी मद्य पाठवताना कोणाला शंका येऊ नये यासाठी ते फळांचे ज्युस किंवा घरचं जेवण आहे असं वाटावं या पद्धतीने अॅल्युमिनियमच्या पॅकेटमध्ये रॅप करुन पार्सल दिले होते. परंतु सुरक्षा रक्षकांना संशय आल्याने त्यांनी ते पार्सल उघडून पाहिलं असता त्यात दारु असल्याचं समोर आलं.
कोरोना रुग्णांना उपचारासाठी दाखल केल्यानंतर काही दिवसांनी ते रुग्ण उपचार घेतल्यानंतर बऱ्यापैकी धोक्यातून बाहेर आले असतात. यानंतर त्यांना आयसोलेशन वॉर्डमध्ये दाखल करण्यात येतं. त्याच ठिकाणी असलेल्या रुग्णांच्या नातेवाईकांनी शौकिनांची तल्लफ भागवण्यासाठी हा प्रयत्न केला होता. मात्र हा प्रयत्न वैद्यकीय महाविद्यालयाच्या डॉक्टर आणि सुरक्षारक्षकांनी हाणून पाडला.
महत्त्वाच्या बातम्या
ट्रेंडिंग न्यूज
