Sugarcane Kulfi : दौंडमधील शेतकऱ्यांनी बनवली ऊसापासून कुल्फी; कुल्फीवर सगळेच फिदा...

आजपर्यंत आपण ऊसापासून साखर, गूळ आणि काकवी तयार झालेली बघितली असेल परंतु ऊसापासून कुल्फी बनवलेली पाहिली आहे का? होय फक्त कुल्फीच नाही तर ऊसापासून कुल्फी, चटणी, स्लश, बर्फ गोळा, जाम बनवला आहे.

sugarcane kulfi

Sugarcane Kulfi : आजपर्यंत आपण (Sugarcane) ऊसापासून साखर, गूळ आणि काकवी तयार झालेली बघितली असेल परंतु ऊसापासून कुल्फी (Kulfi) बनवलेली पाहिली आहे का? होय फक्त कुल्फीच नाही तर ऊसापासून कुल्फी, चटणी, स्लश, बर्फ गोळा, जाम बनवला आहे. दौंड (Daund) तालुक्यातील शेतकऱ्यांच्या ग्रुपने ऊसापासून हे सगळे पदार्थ बनवले आहेत. ऊसापासून तयार केलेल्या या सगळ्या उपपदार्थांवर नागरिक चांगलेच फिदा झाले आहेत. 

उन्हाळ्याला सुरुवात झाली आहे. त्यामुळे अनेक लोक आईस्क्रीम आणि कुल्फीवर हमखास ताव मारताना दिसतात. हेच ओळखून ऊसाच्या कुल्फीची कल्पना सुचली. दौंड तालुक्यातील आलेगाव येथील 10 शेतकऱ्यांनी एकत्र येऊन मॅजिक केन सेलिब्रिटिंग फार्मर्स ग्रुप बनवला आहे. या ग्रुपच्या माध्यमातून शेतकरी ऊसापासून कुल्फी, चटणी, बर्फ गोळा, जाम बनवत आहेत. त्याला चांगली मागणी आहे.

कोरोना काळात अनेकांनी आपले नवीन व्यवसाय सुरु केले. त्याचप्रमाणे कोरोनानंतर शेतकऱ्यांनी एकत्र येऊन ऊसाच्या कुल्फीचा व्यवसाय सुरु केला. कुल्फीला सध्या चांगली मागणी आहे. दहा शेतकऱ्यांनी प्रत्येकी अर्धा एकर ऊसाची लागवड केली आहे. त्यातून ते ऊसापासूनचे उपपदार्थ बनवत आहेत. ऊसाचा रस फ्रोजन करुन ठेवला जातो. जर ऊस कारखान्याला दिला असता तर टनाला 2 ते 3 हजार रुपये मिळाले असते परंतु त्यांना कुल्फी बनवल्या नंतर त्यांना 15 हजार रुपये प्रति टन दर मिळतो आहे. 

ऊसाच्या कुल्फीवर नागरिक फिदा...

सेंद्रिय पद्धतीने पिकवलेल्या ऊसापासून बनवलेली कुल्फी ही ग्राहकांच्या पसंतीस उतरते आहे. दररोज 1000 ते 1200 कुल्फी विकल्या जातात. अष्टविनायक रस्त्यालगत आऊटलेट असल्याने भाविक मोठ्या प्रमाणात ग्राहक वर्ग आहे. ऊसाची कुल्फी पहिल्यांदा पाहिल्याने लोक इथे थांबत आहेत. ऊसापासूनची कुल्फी ही आरोग्यदायी असल्याचे सांगत आहेत. थंड कुल्फी खाल्ल्याने आरोग्यास कोणताही धोका नसल्याचे सांगितले जात आहे. तसेच कुल्फीची किंमत देखील फक्त 10 रुपये आहे. यासाठी लागणारी मशनिरी ही मुंबई आयआयटीमधून आणण्यात आली आहे. ऊस बाहेर ठेवला तर अर्ध्या तासात काळा पडतो परंतु ही कुल्फी 6 महिने टिकते. ग्रुपमधील शेतकऱ्यांना रोजचे हजार रुपये मिळत आहेत. अनेकदा ऊस कारखान्याला जात नाही म्हणून शेतकरी ऊस पेटवून कारखान्याला घालवतात. त्यामध्ये शेतकऱ्यांचे मोठं नुकसान होतं. शेतकऱ्यांनी दौंड तालुक्यातील आलेगाव येथील शेतकऱ्यांचा आदर्श घेतला तर अनेक शेतकऱ्यांना चांगला फायदा होईल यात शंका नाही.