छगन भुजबळ आणि अमृता पवार यांच्यातील वाद मुंबई दरबारी; गिरीश महाजन यांची भेट, देवेंद्र फडणवीस यांच्याकडे तक्रार

Chhagan Bhujbal vs Amruta Pawar : अन्न नागरी पुरवठा मंत्री छगन भुजबळ आणि भाजपच्या अमृता पवार यांच्यांत विधानसभा निवडणुकीच्या आधीच राजकीय सामना सुरू झालाय. दरम्यान, हा वाद आता मुंबईपर्यंत पोहचला आहे.

Chhagan Bhujbal vs Amruta Pawar

Source : Source : ABP Majha

नाशिक : विधानसभा निवडणुकीच्या (Vidhan Sabha Election 2024) तोंडावर येवला (Yeola) मतदारसंघात मानापमान नाट्य रंगल्याचे दिसून येत आहे. नांदूरमध्यमेश्वर ग्रामपंचायत अंतर्गत अंगणवाडी आणि आरोग्य केंद्राच्या उद्घाटन कार्यक्रमासाठी निमंत्रित केले नसल्यानं राष्ट्रवादी अजित पवार गटाचे नेते आणि मंत्री छगन भुजबळ (Chhagan Bhujbal) यांनी ग्रामपंचायत, जिल्हा परिषद प्रशासन आणि माजी जि. प. सदस्य अमृता पवार (Amruta Pawar), सुरेखा नरेंद्र दराडे (Surekha Darade) यांच्या विरोधात विधानसभा अध्यक्षांकडे तक्रार केली होती. 

दरम्यान, येवला विधानसभा मतदारसंघातील हाच वाद आता मुंबईपर्यंत पोहचला आहे. अन्न नागरी पुरवठा मंत्री छगन भुजबळ आणि भाजपच्या अमृता पवार यांच्यांत विधानसभा निवडणुकीच्या आधीच राजकीय सामना सुरू झालाय. विकासकामाच्या उद्घाटन समारंभाला निमंत्रित केले नसल्याने भुजबळ यांनी हक्कभंग प्रस्ताव आणण्याची मागणी  केल्यानंतर  भाजपच्या अमृता पवार यांनी गिरीश महाजन यांची भेट घेतलीय. सोबतच देवेंद्र फडणवीस यांच्याकडे ही छगन भुजबळ यांची तक्रार करणार असल्याचा पवित्रा अमृता पवार यांनी घेतला आहे. 

येवलातील हा वाद महायुतीचे नेते कसा मिटविणार? 

अमृता पवार भाजपच्या येवला विधानसभा प्रमुख आणि आजी जिल्हा परिषदेच्या सदस्या आहेत. त्यांच्या विकासनिधीतून झालेल्या कामाच्या लोकार्पण सोहळा वरून पवार आणि भुजबळ यांच्यांत वादाची ठिणगी पडली आहे. भुजबळ महाविकास आघाडीत होते तेव्हापासून येवला मतदारसंघाची निवडणूक लढविण्याची तयारी अमृता पवार करत असून निवडणूक लढविण्यावर आजही ठाम आहेत. तसच भुजबळ आणि पवार वाद जुना असल्याची आठवण ही त्यांनी या निमित्ताने करून दिल्यानं येवलातील हा वाद महायुतीचे नेते कसा मिटविणार याकडे लक्ष लागलंय.

प्रतिस्पर्धी असल्याने भुजबळांनी तक्रार केल्याचा दावा

एवढ्या मोठ्या उंचीच्या नेत्याने एवढे छोटे मन दाखवले याचे दुःख वाटते. माझ्या निधीतून ही कामे झाली आहेत. त्यांना निमंत्रित न करणे हा हेतू नसल्याचे स्पष्टीकरण अमृता पवार यांनी दिले आहे. तर येवला विधानसभा मतदारसंघातून भाजप नेत्या अमृता पवार निवडणूक लढविण्यासाठी इच्छुक आहेत. शिवसेना ठाकरे गटाकडून निवडणूक लढविण्यासाठी दराडे कुटुंबाकडून चाचपणी सुरू आहे. आपले प्रतिस्पर्धी असल्याने भुजबळांनी तक्रार केल्याचा दावा देखील अमृता पवार यांनी केला आहे. तर याबाबत आपण भाजपच्या वरिष्ठ नेत्यांची भेट घेणार असल्याचेही त्यांनी सांगितले आहे. 

हे ही वाचा