एक्स्प्लोर

Kolhapur Rain update : महापुराचे रौद्ररुप पाहणाऱ्या कोल्हापूर जिल्ह्याला पावसाची आस, दडी मारल्याने चिंता वाढली

पावसाचे आगार समजल्या जाणाऱ्या कोल्हापूर जिल्ह्यातील (Kolhapur Rain update) आजरा, राधानगरी, भुदरगड आणि गगनबावडा तालुक्यातही पावसाने दडी मारली आहे. सर्वच तालुक्यांमध्ये तुलनेत अत्यल्प पाऊस झाला आहे.

By : परशराम पाटील | Edited By: परशराम पाटील | Updated at : 16 Jun 2022 12:13 PM (IST)

Kolhapur Rain update

Kolhapur Rain update : गेल्या तीन वर्षांपासून महापुराचे रौद्ररुप पाहणाऱ्या कोल्हापूर जिल्ह्यात पावसाने दडी मारल्याने सर्वांचीच चिंता वाढली आहे. मान्सूनपूर्व जोरदार पावसाच्या सरींनी बळीराजांनी आनंदाने पेरणी करून घेतली होती. मात्र, त्यानंतर हुकमी असा पाऊस पडलाच नसल्याने चिंता दिवसागणिक वाढत चालली आहे. पावसाने अशीच दडी मारल्यास जिल्ह्यावर दोबार पेरणीचे संकट ओढावणार आहे.

पावसाचे आगार समजल्या जाणाऱ्या कोल्हापूर जिल्ह्यातील आजरा, राधानगरी, भुदरगड आणि गगनबावडा तालुक्यातही पावसाने दडी मारली आहे. जिल्ह्यातील सर्वच तालुक्यांमध्ये गेल्यावर्षीच्या तुलनेत अत्यल्प पाऊस झाला आहे. त्यामुळे सर्वांचेच पावसाकडे डोळे लागले आहेत. त्यामुळे गेल्या तीन वर्षांपासून महापूर पाहणाऱ्या नद्याही पावसाची वाट पाहू लागल्या आहेत. आतापर्यंत (15 जून) गेल्यावर्षीच्या तुलनेत तब्बल 36 टक्के पाऊस कमी झाला आहे.

कोल्हापूर शहर

मागील चोवीस तासातील पाऊस- 0 एमएम
1 जून 22 पासून आजपर्यंत पाऊस-78 एमएम
गतवर्षी आजपर्यंतचा पाऊस 46 एमएम

जून महिन्यातील तालुकानिहाय सरासरी पाऊस (मिमी)

तालुका	सरासरी	2022	2021
हातकणंगले	58	18	48
शिरोळ	51	20	70
पन्हाळा	155	27	71
शाहूवाडी	177	47	134
राधानगरी	332	16	97
गगनबावडा	535	53	343
करवीर	91	37	63
भुदरगड	169	34	80
कागल	63	22	76
गडहिंग्लज	93	25	121
आजरा	195	27	113
चंदगड	284	42	142