Israel Iran Conflict : अमेरिका-इस्रायलच्या हल्ल्यात इराणचे माजी राष्ट्राध्यक्ष अहमदीनेजाद ठार? पश्चिम आशियात तणाव शिगेला

Israel Iran War : महमूद अहमदीनेजाद हे 2005 ते 2013 या कालावधीत इराणचे राष्ट्राध्यक्ष होते. त्यांच्या पाश्चिमात्य देश आणि इस्त्रायलच्या विरोधातील वक्तव्यांमुळे ते चर्चेत असायचे. 

Mahmoud Ahmadinejad

Source : abp majha

Israel Iran Conflict : पश्चिम आशियातील सुरू असलेल्या संघर्षाच्या पार्श्वभूमीवर इराणचे माजी राष्ट्राध्यक्ष महमूद अहमदीनेजाद यांच्या मृत्यूचा दावा माध्यमांमध्ये करण्यात आला आहे. अमेरिकन आणि इस्रायली हवाई हल्ल्यात ते ठार झाल्याचे वृत्त समोर आले असून या घटनेमुळे पश्चिम आशियातील राजकारणात मोठी खळबळ उडाली आहे.

इराणी लेबर न्यूज एजन्सीने रविवारी (1 मार्च 2026) दिलेल्या वृत्तानुसार, इस्रायल-अमेरिका एअर स्ट्राईकमध्ये अहमदीनेजाद यांच्या तेहरानमधील निवासस्थानाला लक्ष्य करण्यात आले. या हल्ल्यात त्यांच्यासह अनेक अंगरक्षकांचा मृत्यू झाल्याचा दावा करण्यात आला आहे.

अहमदीनेजाद यांच्या मृत्यूचा दावा (Mahmoud Ahmadinejad Death Claim)

महमूद अहमदीनेजाद हे 2005 ते 2013 या कालावधीत इराणचे राष्ट्राध्यक्ष होते. राष्ट्राध्यक्ष होण्यापूर्वी त्यांनी अर्दबिल प्रांताचे राज्यपाल तसेच तेहरानचे महापौर म्हणून काम पाहिले होते. त्यांच्या पश्चिमविरोधी भूमिकेमुळे ते आंतरराष्ट्रीय पातळीवर चर्चेत राहिले. इस्रायलच्या अस्तित्वावर प्रश्नचिन्ह उपस्थित करणारी आणि कठोर वक्तव्यं करणारे नेते म्हणून त्यांची ओळख होती.

माध्यमांतील दाव्यानुसार, तेहरानच्या नरमक भागातील त्यांच्या निवासस्थानावर हवाई हल्ला करण्यात आला. मात्र या वृत्ताला अधिकृत पातळीवर अद्याप दुजोरा मिळालेला नाही.

सर्वोच्च नेते खामेनी यांच्या मृत्यूनंतर तणाव (Khamenei Death Impact)

अयातुल्ला अली खामेनी यांच्या मृत्यूच्या बातमीनंतर इराणमध्ये नव्या नेतृत्व परिषदेने कार्यभार स्वीकारल्याचे राष्ट्राध्यक्षांनी सांगितले. खामेनी यांनी तब्बल 36 वर्षे इराणवर प्रभावी नियंत्रण ठेवले होते. त्यांची तुलना अनेकदा अयातुल्ला रुहोल्ला खोमेनी यांच्याशी केली जात असे, ज्यांनी 1979 मध्ये इस्लामी प्रजासत्ताक इराणची स्थापना केली होती.

इराणचे विद्यमान राष्ट्राध्यक्ष मसूद पेजेशकियान यांनी स्पष्ट केले की, अमेरिका आणि इस्रायलच्या हल्ल्यांना इराणकडून कठोर प्रत्युत्तर दिले जाईल. पश्चिम आशियातील बदलत्या राजकीय समीकरणांमुळे परिस्थिती अधिकच गंभीर बनत आहे.

भारतात शिया समाजाचे आंदोलन (Shia Protests in India)

खामेनी यांच्या मृत्यूच्या वृत्तानंतर भारतातील विविध भागांत शिया समाजाकडून निषेध व्यक्त करण्यात आला. काश्मीरपासून कर्नाटकपर्यंत, तसेच नवी दिल्ली, बिहार, झारखंड आणि तेलंगणा येथे निदर्शने करण्यात आली. आंदोलकांनी अमेरिका आणि इस्रायलच्या लष्करी कारवाईविरोधात घोषणाबाजी केली.

पश्चिम आशियातील परिस्थिती चिंताजनक (West Asia War Update)

पश्चिम आशियात सुरू असलेला संघर्ष अधिक तीव्र होत असून अमेरिका-इस्रायल-इराण यांच्यातील तणाव जागतिक पातळीवर परिणाम घडवू शकतो, अशी भीती व्यक्त केली जात आहे. या घडामोडींमुळे आंतरराष्ट्रीय राजकारणात मोठे बदल होण्याची शक्यता नाकारता येत नाही.

ही बातमी वाचा: