Dr. Shyamala Vanarase : प्रसिद्ध मानसशास्त्रज्ञ डॉ. श्यामला वनारसे यांचं निधन; साहित्य, बालकारण आणि मानसशास्त्र क्षेत्राची मोठी हानी
Dr. Shyamala Vanarase Passed Away : डॉ. श्यामला वनारसे आणि डॉ. सुधीर वनारसे यांनी एकत्र लिहिलेल्या ‘स्वभावाला औषध असते’ या पुस्तकाला राज्य पुरस्कार प्राप्त झाला आहे.
पुणे : प्रसिद्ध मानसशास्त्रज्ञ आणि बालकारणी डॉ. श्यामला वनारसे यांचे पुण्यात अल्प आजाराने निधन झाले. त्या 87 वर्षांच्या होत्या. त्यांच्या निधनाने साहित्य, सांस्कृतिक आणि मानसशास्त्र क्षेत्रात शोककळा पसरली आहे.
डॉ. श्यामला वनारसे यांनी साहित्य, संगीत, नृत्य, सिनेमा, बालकारण आणि मानसशास्त्र अशा विविध क्षेत्रांत मोलाचे योगदान दिले. मराठी आणि इंग्रजी या दोन्ही भाषांत त्यांनी विपुल लेखन केले असून अनेक पुस्तके आणि लेख त्यांच्या नावावर आहेत.
औद्योगिक मानसशास्त्रातील कार्य (Industrial Psychology Contribution)
पती दिवंगत डॉ. सुधीर वनारसे यांच्या समवेत डॉ. श्यामला वनारसे यांनी औद्योगिक मानसशास्त्र या विषयावर व्यापक काम केले. अनेक उद्योगसंस्थांबरोबर त्यांनी मानवी संसाधन विकास आणि व्यक्तिमत्त्व विकासाच्या दृष्टीने काम केले. कार्यक्षमता वाढ, संघटनात्मक वर्तन आणि नेतृत्व विकास या क्षेत्रांत त्यांचे योगदान उल्लेखनीय मानले जाते.
राज्य पुरस्कार प्राप्त साहित्य (Award-Winning Books)
डॉ. श्यामला वनारसे आणि डॉ. सुधीर वनारसे यांनी एकत्र लिहिलेल्या ‘स्वभावाला औषध असते’ या पुस्तकाला राज्य पुरस्कार प्राप्त झाला आहे. तसेच ‘सत्यजित राय’ आणि ‘भारतीय मन्वंतर’ या पुस्तकांनाही राज्य पुरस्कारांनी गौरविण्यात आलं आहे. त्यांच्या साहित्यनिर्मितीत सामाजिक जाण, मानवी मनाचा अभ्यास आणि संस्कृतीविषयक चिंतन यांचा सुंदर संगम दिसून येतो.
सांस्कृतिक संस्थांमध्ये योगदान (Cultural Institutions Contribution)
गरवारे बालभवन, कलाछाया सांस्कृतिक केंद्र आणि अक्षरनंदन अशा अनेक संस्थांच्या जडणघडणीत डॉ. श्यामला वनारसे यांचा मोलाचा वाटा होता. बालविकास आणि सांस्कृतिक जडणघडण या क्षेत्रात त्यांनी दीर्घकाळ काम केलं.
डॉ. श्यामला वनारसे यांच्या पश्चात त्यांचा मुलगा रंगकर्मी प्रसाद वनारसे, सून लेखिका मृणालिनी वनारसे आणि मुलगी नर्तिका गौरी वनारसे असा परिवार आहे. रविवारी रात्री उशिरा पुण्यातील वैकुंठ स्मशानभूमी येथे त्यांच्यावर अंत्यसंस्कार करण्यात आलं.
महत्त्वाच्या बातम्या
