Kolhapur Zilla Parishad Election: गुलाबी साडी अन्! कोल्हापुरात जावळाच्या कार्यक्रमात पाच लाखांच्या साड्या; भरारी पथकाने पाठलाग करत टेम्पो पकडला, मतदारांना वाटण्यासाठी साड्या आणल्याचा संशय

Kolhapur Zilla Parishad Election: निवडणुकीच्या तोंडावर अशा प्रकारची कारवाई झाल्याने जिल्ह्यात खळबळ उडाली असून, निवडणूक आयोगाच्या पथकांकडून पुढील काळात अशाच धाडी वाढण्याची शक्यता वर्तवली जात आहे.

kolhapur zilla parishad Election

कोल्हापूर जिल्ह्यात जिल्हा परिषद निवडणुकीच्या पार्श्वभूमीवर निवडणूक यंत्रणा सतर्क झाल्याचे चित्र समोर आले आहे.

करवीर तालुक्यातील वाशी गावात भरारी पथकाने धाड टाकून तब्बल पाच लाख रुपये किमतीच्या साड्या जप्त केल्याची मोठी कारवाई उघडकीस आली आहे.

या साड्या मतदारांना वाटण्यासाठी आणल्या असल्याचा संशय व्यक्त केला जात आहे.

मिळालेल्या माहितीनुसार, वाशी गावात एका जावळाच्या कार्यक्रमाच्या वेळी संशयास्पद हालचालींची माहिती निवडणूक भरारी पथकाला मिळाली. त्यानुसार पथकाने तात्काळ धाड टाकली.

भरारी पथकाची गाडी येत असल्याचे लक्षात येताच साड्यांनी भरलेला टेम्पो चालक घटनास्थळावरून पळण्याचा प्रयत्न करू लागला. मात्र सतर्क पथकाने त्याचा पाठलाग करून वाहनासह चालकाला ताब्यात घेतले.

टेम्पोची तपासणी केली असता मोठ्या प्रमाणात साड्यांचा साठा आढळून आला. प्राथमिक अंदाजानुसार या साड्यांची किंमत सुमारे पाच लाख रुपये असल्याचे सांगितले जात आहे.

या साड्या जिल्हा परिषद निवडणुकीच्या पार्श्वभूमीवर मतदारांना वाटप करण्यासाठी आणल्या गेल्या असाव्यात, असा संशय अधिकाऱ्यांनी व्यक्त केला आहे.

ही कारवाई भरारी पथकाचे प्रमुख प्रवीण कोडोलीकर यांच्या उपस्थितीत करण्यात आली. त्यांनी संपूर्ण पंचनामा प्रक्रिया पूर्ण करून मुद्देमाल जप्त केला.

या प्रकरणी करवीर पोलीस ठाण्यात गुन्हा दाखल करण्याची प्रक्रिया सुरू असून, साड्यांचा साठा कुठून आणला गेला, त्यामागे कोणाचा संबंध आहे आणि त्या नेमक्या कुणासाठी होत्या याचा तपास पोलिसांकडून केला जाणार आहे.

निवडणुकीच्या तोंडावर अशा प्रकारची कारवाई झाल्याने जिल्ह्यात खळबळ उडाली असून, निवडणूक आयोगाच्या पथकांकडून पुढील काळात अशाच धाडी वाढण्याची शक्यता वर्तवली जात आहे.