ED raids on Vivo : ईडीच्या छापेमारीनंतर Vivo चे डायरेक्टर देशातून फरार, मनी लाँड्रिंग आणि टॅक्स चोरीचा आरोप

ED ने विवो आणि त्यांच्याशी संबंधित कंपन्यांच्या विरोधात मनी लाँड्रिंगच्या चौकशीच्या संदर्भात 44 ठिकाणी छापे टाकले. छापे टाकल्यानंतर कंपनीचे संचालक झेंगशेन ओऊ आणि झांग जी देश सोडून पळून गेले आहेत. 

ED raids on Vivo

ED raids on Vivo : अंमलबजावणी संचालनालयाने (ED) चिनी मोबाईल कंपनी Vivo विरुद्ध मनी लाँड्रिंग प्रकरणाचा तपास तीव्र केला आहे. या संदर्भात 5 जुलै रोजी ईडीने विवो आणि त्यांच्याशी संबंधित कंपन्यांच्या विरोधात मनी लाँड्रिंगच्या चौकशीच्या संदर्भात देशभरातील विविध राज्यांमध्ये 44 ठिकाणी छापे टाकले होते. छापे टाकल्यानंतर कंपनीचे संचालक झेंगशेन ओऊ आणि झांग जी देश सोडून पळून गेले आहेत. 

ईडीने अलीकडेच विवोविरुद्ध मनी लाँड्रिंगचा गुन्हा दाखल केला होता. चिनी मोबाईल कंपन्यांवर रॉयल्टी आणि करचुकवेगिरीच्या नावाखाली देशाबाहेर पैसे पाठवल्याचा आरोप आहे. दरम्यान, चीनने बुधवारी आशा व्यक्त केली की, भारत कायदा आणि नियमांनुसार Vivo विरुद्ध चौकशी करेल. चीनच्या परराष्ट्र मंत्रालयाचे प्रवक्ते झाओ लिजियान म्हणाले की, आम्ही या प्रकरणावर बारकाईने लक्ष ठेवून आहोत.

Xiaomi वरही कारवाई करण्यात आली

ईडीने यापूर्वी एप्रिलमध्ये फेमा उल्लंघनाच्या आरोपाखाली चीनी मोबाइल कंपनी Xiaomi ची 5,551 कोटी रुपयांची मालमत्ता जप्त केली होती. कंपनीने आपली कमाई बेकायदेशीरपणे भारताबाहेर पाठवल्याचा आरोप होता. कंपनीने ही हेराफेरी या महिन्यात फेब्रुवारीमध्ये केली होती, त्यानंतर मालमत्ता जप्त करण्याची कारवाई करण्यात आली होती.
ईडीने म्हटले आहे की टेक कंपनी चीनमधील मूळ कंपनीच्या सांगण्यावरून रॉयल्टीच्या नावाखाली एवढ्या मोठ्या रकमेचा गैरवापर करत आहे. तसेच अमेरिकेतील Xiaomi ग्रुप कंपनीला पाठवण्यात आले होते.

चीनच्या मोबाईल कंपन्या आयटी आणि ईडीच्या निशाण्यावर 

इतर चिनी कंपन्यांप्रमाणे विवो देखील आयटी आणि ईडीच्या रडारवर आहे. एप्रिलमध्ये, विवोच्या मालकी आणि आर्थिक अहवालांमध्ये तफावत आहे का हे पाहण्यासाठी चौकशी करण्यात आली होती. ईडी, सीबीआयसोबतच कॉर्पोरेट अफेअर्स मंत्रालयही या कंपन्यांशी संबंधित कंपन्यांवर बारीक नजर ठेवून आहे.

Huawei वरही छापा 

प्राप्तिकर विभागाने फेब्रुवारीमध्ये Huawei च्या कार्यालयांवरही छापे टाकले होते. तपास यंत्रणेची ही झडती दिल्ली, हरियाणा, गुरुग्राम आणि बंगळुरू येथील कार्यालयात घेण्यात आली. करचोरी प्रकरणातील काही कागदपत्रेही अधिकाऱ्यांनी जप्त केली होती. Huawei ने एका निवेदनात म्हटले होते की, आम्ही भारतात कंपनी चालवण्यासाठी प्रत्येक नियमाचे पालन करत आहोत.

फोन बाजारात चिनी कंपन्यांचे वर्चस्व

देशातील मोबाइल बाजारपेठेत चिनी कंपन्यांचे वर्चस्व आहे. Xiaomi, Oppo आणि Vivo सारख्या कंपन्या चांगली कमाई करत आहेत. या सर्व कंपन्यांवर गेल्या काही वर्षांत नियामक फाइलिंग आणि इतर अहवालात गैरप्रकार केल्याचा आरोप आहे. यासोबतच देशाबाहेर पैसे पाठवल्याचाही आरोप आहे, त्यानंतर सरकारने सर्वांविरुद्ध मोठी चौकशी सुरू केली. अनेक एजन्सी हा तपास करत आहेत.

इतर महत्त्वाच्या बातम्या