ज्या गोदापट्ट्याने आजपर्यंत सर्वांना जगवलं त्यांच्यावरच उपासमारीची वेळ, सरकारी मदतीची वाट बघताना धीर खचला
Beed Flood:आम्हाला जेवायला नको पण जनावरांना चारा पाठवा अशी अर्जव बळीराजा करतोय. गावात पाणी शिरल्यानंतर नेमकी परिस्थिती काय ? गावातील लोकांचे स्थलांतर नेमकं कुठे केलं ? पाहूया
Beed Flood : जायकवाडी धरणामधून पाण्याचा विसर्ग सुरू आहे . त्यामुळे गोदाकाठच्या गावात पाणी शिरलय . पुराच्या पाण्यानं नागरिकांची मोठी तारांबळ उडाली आहे . बीड जिल्ह्यातील 44 गावांना या पाण्याचा फटका बसला असून नागरिकांचे वेगवेगळ्या ठिकाणी स्थलांतर करण्यात आले आहे . ज्या गोदापट्ट्याने आजपर्यंत सर्वांना जगवलं त्यांच्यावरच आता उपासमारीची वेळ आली आहे. (Flood) सरकारी मदतीची वाट बघताना नागरिकांचा धीर खचत आहे. आम्हाला जेवायला नको पण जनावरांना चारा पाठवा अशी अर्जव बळीराजा करतोय. गावात पाणी शिरल्यानंतर नेमकी परिस्थिती काय ? गावातील लोकांचे स्थलांतर नेमकं कुठे केलं ? पाहूया
मिळेल त्या ठिकाणी आश्रयाला नागरिक थांबले...
गेवराई तालुक्यातील साळवेश्वर, गुळज, नागझरी या गावांमध्ये पाणी शिरलं आहे . त्यामुळे मिळेल त्या ठिकाणी नागरिकांनी स्थलांतर केले आहे .मिळेल त्या ठिकाणी आश्रय घेतला आहे . गावात पुराचे पाणी शिरलं आणि नागरिकांना त्यांचं राहतं घर सोडावं लागलं. रात्रीपासून झालेल्या पावसानं आणि विसर्गाच्या पाण्याने गेवराई तालुक्यातील गावागावांमध्ये पाणी शिरलं. गरजेपुरत्या वस्तू बांधून घेत नागरिकांनी सकाळी घर सोडलं. जागा मिळेल तिथे नागरिक आश्रयाला थांबले आहेत. प्रशासनाची मदत अजून त्यांच्यापर्यंत पोहोचलेली नाही.
नदीकाठच्या नागरिकांना दरवर्षीच पुराचा धोका असल्याचं गावातील वयोवृद्ध महिलेने सांगितलं. "नाथसागरातून पाणी आलं की रात्र दिवस बघावं लागत नाही. घर तातडीने सोडावं लागतं. अशा पद्धतीने बाहेर पडायची आमची तिसरी वेळ आहे" असं स्थलांतर केलेल्या एका महिलेने सांगितलं. घर पाण्यात जातात. आयुष्यभर जमा केलेली पुंजी क्षणार्धात पाण्यात वाहून जाते. "लेकरा बाळांचे हाल होतात. पुस्तक दप्तर भिजून गेली आहेत. कुणी खायला आणून देतो कोणी हातात घेऊन तसेच पळतय. आम्ही रात्री एक वाजता बाहेर पडलो. पांघरायला घेऊन आले आहे." असं एका वृद्ध महिलेने सांगितले.
गावाला पुराचा वेढा, नागरिकांनी रात्रीतून गाव सोडलं
एकीकडे धरणाचा विसर्ग तर दुसरीकडे रात्रभर कोसळणारा बेफाम पाऊस. गेवराई तालुक्यातील सावळेश्वरसह 44 गावांना पुराचा फटका बसला आहे. "गावात पाणी शिरल्यामुळे आम्ही दहा वाजता गाव सोडलं. यात प्रशासनाची कुठलीही मदत आम्हाला मिळालेली नाही. सगळ्यांचे फोन बंद आहेत. इथं माणसांप्रमाणे जनावरांच्या चाऱ्याचाही मोठा प्रश्न निर्माण झालाय. लोक जीवावर उदार होऊन जनावराला चारा आणतायत. लोकांना खायला मिळत नाहीये .जे सोबत आणलं होतं ते संपलं . लोक तेवढ्या पाण्यातून पुन्हा गावात जाऊन काही शिल्लक असलेलं अन्न ते घेऊन येत आहेत" असं एका तरुणाने सांगितले .
ज्या गोदा पट्ट्याने जगवलं ,त्यांच्यावरच उपासमारीची वेळ
"गावातील लोकांना रात्री तीन वाजल्यापासून बाहेर काढत आहोत .तुम्ही शासनाची त्यात एकही चक्कर नाही . एकदा तहसीलदार येऊन गेले त्यांनाही आम्ही सांगितलं की माणसाला अन्न दिले नाही तरी चालेल जनावरांच्या चाऱ्याची व्यवस्था करा . आता सकाळी फोन केला तेव्हा ते म्हणतात आम्ही सरकारकडे जनावराच्या चाऱ्याची शिफारस करतो . ज्या गोदापट्ट्याने हा सगळा परिसर जगवला .त्यांच्यावर उपासमारीची वेळ आली आहे . एका जिनिंग मध्ये नागरिकांचे स्थलांतर करण्यात आला आहे .पुराना वेढलेल्या गावांपासून दीड किलोमीटर लांब जिनिंग असलं तरी आता दुसऱ्या बाजूने पाणी येण्याची शक्यता असल्याची भीती नागरिक व्यक्त करत आहेत .
महत्त्वाच्या बातम्या
