Ajit Pawar: अजित पवारांच्या बीड दौऱ्यात पंकजा मुंडे यांचीही उपस्थिती; धनंजय मुंडेंच्या उपस्थितीबाबत सस्पेन्स कायम!
Ajit Pawar : अजित पवार यांच्या बीड दौऱ्यात पंकजा मुंडे या देखील सोबत असणार असल्याचे समोर आले आहे. मात्र बीडच्या डीपीडिसी बैठकीत धनंजय मुंडे उपस्थित राहणार का? हे पाहणे आता महत्वाचे ठरणार आहे.
छत्रपती संभाजीनगर : राज्याचे उपमुख्यमंत्री अजित पवारांच्या (Ajit Pawar) बीड (Beed) दौऱ्याबाबत मोठी बातमी पुढे आली आहे. अजित पवार यांच्या बीड दौऱ्यात पंकजा मुंडे (Pankaja Munde) या देखील सोबत असणार असल्याचे समोर आले आहे. अजित पवार आणि पंकजा मुंडे आज(29 जानेवारीला) एकाच विमानाने संभाजीनगरला पोहचणार असल्याचे ही बोलले जात आहे. तर उद्या म्हणजेच 30 जानेवारीच्या बीडच्या डीपीडीसी बैठकीत अजित पवारांसह पंकजा मुंडे देखील उपस्थित राहणार आहे.
दरम्यान, मस्साजोगचे सरपंच संतोष देशमुख हत्या प्रकरणात एकीकडे वाल्मिक कराडचा पाय खोलात जात असतानाच दुसरीकडे धनंजय मुंडे यांच्यावरही सतत टीका केली जात आहे. मकोका लागलेल्या वाल्मिक कराड (Walmik Karad) प्रकरणावरून अन्न आणि नागरी पुरवठा मंत्री धनंजय मुंडे (Dhananjay Munde) यांच्या राजीनाम्यासाठी दबाब वाढतच चालला आहे. अशातच उद्याच्या बीडच्या डीपीडिसी बैठकीत धनंजय मुंडे उपस्थित राहणार का? हे पाहणे आता महत्वाचे ठरणार आहे.
अजित पवारांकडून जिल्हा बँकेच्या संदर्भात बैठक
दुसरीकडे राज्याचे उपमुखमंत्री अजित पवारांच्या मंत्रालयातील दालनात आज (29 जानेवारी) बीड आणि नाशिक जिल्हा बँकेच्या संदर्भात बैठक पार पडली. या बीडच्या डीपीडीसी बैठकी आधी मंत्री पंकजा मुंडे यांनी अजित पवारांचे भेट घेतलीय. तसेच मंत्री माणिकराव कोकाटे, नरहरी झिरवाळ यांची ही उपमुखमंत्री अजित पवार यांच्यासोबत नाशिक जिल्हा बँक प्रकरणी बैठक पार पडली. नाशिक जिल्हा बँक अडचणीत असल्यामूळ हे लोकप्रतिनिधी उपमुखमंत्री अजित पवार यांच्या भेटीला आल्याचे ही बोलले जात आहे. निवडणुक काळात अजित पवारांकडून संबंधित बँका आर्थिक अडचणीतून बाहेर काढू, असं आश्वासन देण्यात आलं होतं.
गेल्या काही दिवसांपासून कर्ज आणि परतफेड यांचा ताळमेळ बसत नसल्याने सरकारने नाशिक बँकेवर निर्बंध लादले आहेत. परिणामी खातेदार, सहकारी सोसायट्या पैसे मिळत नसल्याने अडचणीत आहेत. बीड जिल्हा बँकेत देखील अनेक घोटाळे उघडकीस आल्यामुळे बँकेवर प्रशासक नेमण्यात आला आहे. दरम्यान, बीड बँकेच आजारपण दूर करण्यासाठी 500 कोटींची तर नाशिक जिल्हा बँकेला 650 कोटींची गरज असल्याची माहिती सूत्रांनी दिली आहे. त्यामुळे राज्यातील अडचणीत असलेल्या बँका संदर्भात अजित पवार काही महत्वपूर्ण निर्णय घेणार का याकडे आता सऱ्यांचे लक्ष लागले आहे.
हे ही वाचा
महत्त्वाच्या बातम्या
ट्रेंडिंग न्यूज
