प्रेक्षकांनाच नाही तर, कलाकारांनाही ‘लोच्या झाला रे’ची उत्सुकता, चित्रपटाचा ट्रेलर दणक्यात प्रदर्शित!

'लोच्या झाला रे' चित्रपटाचा ट्रेलर दणक्यात प्रदर्शित करण्यात आला असून 4 फेब्रूवारीला हा चित्रपट थिएटरमध्ये प्रदर्शित होणार आहे.

Lochya Zala Re Marathi Movie Trailer Launch

Lochya Zala Re : अनेक दिवसांपासून प्रेक्षकांना ज्या चित्रपटाची उत्सुकता होती त्या चित्रपटाचा ट्रेलर आज (24 जानेवारीला) दणक्यात लॉन्च करण्यात आला आहे. या सोहळ्याला अंकुश चौधरी, सिद्धार्थ जाधव, वैदेही परशुरामी, रेशम टीपणीस यांच्यासह चित्रपटाची संपूर्ण टीम उपस्थित होती. सुरेश जयराम यांच्या नाटकावर आधारित 'लोच्या झाला रे' हा चित्रपट आहे. या चित्रपटात अंकुश चौधरी (Ankush choudhary), सिद्धार्थ जाधव (siddhartha jadhav), वैदेही परशुरामी (vaidehi parashurami), रेशम टीपणीस मुख्य भूमिकेत आहेत. तर, सयाजी शिंदे, विजय पाटकर, प्रसाद खांडेकर हेदेखील महत्वाच्या भूमिकेत दिसणार आहेत. काही दिवसांपूर्वीच या चित्रपटाचा धमाकेदार टीझर प्रदर्शित झाला होता. 

या चित्रपटाचं शूटिंग लंडनमध्ये झालं आहे. सयाजी शिंदे यांचा भाचा, अंकुश चौधरीच्या बायकोला भेटायला लंडनला येतात आणि तिथूनच सगळा लोच्या व्हायला सुरुवात होते. असं काहीसं या चित्रपटाचं कथानक आहे. चित्रपटात वैदेही परशुरामी नेमकी अंकुशची बायको आहे का सिद्धार्थची? याबाबत झालेला गोंधळ आपल्याला चित्रपटात पाहायला मिळेल. या सगळ्या धावपळीत नक्की कोणाच्या आयुष्यात लोच्या होतोय, या सगळ्याची उत्तरे आपल्याला चित्रपट पाहिल्यावरच मिळतील . 

या चित्रपटाबद्दल मुंबई मुव्ही स्टुडिओजचे नवीन चंद्रा म्हणतात, "लोच्या झाला रे आमचा पहिला मराठी चित्रपट असून आम्ही सर्वच खूप उत्सुक आहोत. या चित्रपटासाठी आम्ही अनेक गोष्टी करत आहोत. प्रेक्षकांची चित्रपटाबद्दलची उत्सुकता पाहता, त्यांच्या सोयीसाठी बुक माय शो अॅपवर (Book my show) आम्ही दोन आठवडे आधीच शो बुकिंग उपलब्ध करत आहोत. मराठी चित्रपटसृष्टीत हे पहिल्यांदाच घडणार आहे असंही ते म्हणाले."

तर ‘लोच्या झाला रे’ या चित्रपटाचे दिग्दर्शक पारितोष पेंटर म्हणतात, "या चित्रपटाच्या निमित्ताने मी दिग्दर्शक म्हणून पदार्पण करीत आहे. त्यामुळे माझ्यासाठी हा चित्रपट खास आहे. तसेच प्रेक्षकही या चित्रपटावर भरभरून प्रेम करतील अशी आशा आहे." 

नवीन चंद्रा, नितीन केणी, पारितोष पेंटर आणि शांताराम मनवे यांनी चित्रपटाची निर्मिती केली आहे. तर मंगेश रामचंद्र जगताप कार्यकारी निर्माता आहेत . लंडनमध्ये चित्रित झालेला हा चित्रपट मुंबई मुव्ही स्टुडिओज प्रस्तुत आयडिया दि एंटरटेनमेंट कंपनी आणि अभिनय मुंबई प्रोडक्शन अंतर्गत बनवण्यात आला असून वितरणाचे काम यूएफओ मुव्हीझने पाहिले आहे. हा धम्माल चित्रपट प्रेक्षकांच्या भेटीस 4 फेब्रूवारी रोजी येणार आहे. 

महत्वाच्या बातम्या :

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha