Ameya Khopkar: 'पाकिस्तानी कलाकार भारतीय सिनेमांमध्ये किंवा सीरिजमध्ये काम करणार असतील तर त्यांच्या तंगड्या तोडून...'; अमेय खोपकर यांच्या ट्वीटनं वेधलं लक्ष

नुकतेच अमेय खोपकर (Ameya Khopkar) यांनी पाकिस्तानी कलाकारांबाबत एक ट्वीट केलं आहे. त्यांच्या या ट्वीटनं अनेकांचे लक्ष वेधले आहे.

Ameya Khopkar

Ameya Khopkar: महाराष्ट्र नवनिर्माण सेनेचे नेते अमेय खोपकर (Ameya Khopkar) हे सोशल मीडियाच्या माध्यमातून पाकिस्तानी कलाकारांवर निशाणा साधत असतात.  नुकतेच अमेय खोपकर यांनी पाकिस्तानी कलाकारांबाबत एक ट्वीट केलं आहे. त्यांच्या या ट्वीटची चर्चा सध्या सोशल मीडियावर होत आहे.

अमेय खोपकर यांचे ट्वीट

अमेय खोपकर यांनी ट्वीटमध्ये लिहिलं,  'भारतात अशांतता माजवण्यासाठी सतत कुरापती काढणाऱ्या पाकिस्तानची नियत पाक नाही हे ढळढळीत सत्य आहे. पाकिस्तानने केलेल्या दहशतवादी हल्ल्यात निरपराध भारतीयांचे बळी गेले. काहीजण हे विसरले असले तरी आम्ही विसरुच शकत नाही. म्हणूनच फक्त खेळाडूच नाही तर पाकिस्तानी कलाकारांना आमचा विरोध कायम आहे याची आठवण करुन देतोय. पाकिस्तानी कलाकार भारतीय सिनेमांमध्ये किंवा सीरिजमध्ये काम करणार असतील तर त्यांच्या तंगड्या तोडून त्यांच्याच हातात देऊ. त्याची जबाबदारी संपूर्णपणे संबंधित निर्मात्यांची राहील.' अमेय खोपकर यांच्या या ट्वीटला काही नेटकऱ्यांनी लाइक केलं आहे.

भारतात अशांतता माजवण्यासाठी सतत कुरापती काढणाऱ्या पाकिस्तानची नियत पाक नाही हे ढळढळीत सत्य आहे. पाकिस्तानने केलेल्या दहशतवादी हल्ल्यात निरपराध भारतीयांचे बळी गेले. काहीजण हे विसरले असले तरी आम्ही विसरुच शकत नाही. म्हणूनच
फक्त खेळाडूच नाही तर पाकिस्तानी कलाकारांना आमचा विरोध कायम…

— Ameya Khopkar (@MNSAmeyaKhopkar) June 30, 2023

अमेय खोपकर हे अनेकवेळा ट्विटरच्या माध्यमातून पाकिस्तानी कलाकारांवर टीका करत असतात.  मनसेने पाकिस्तानी कलाकारांविरोधात नेहमीच कठोर भूमिका घेतली आहे. 'बॉलिवूडमधील काही निर्मात्यांना पुन्हा एकदा पाकिस्तानी कलाकारांचा पुळका आलाय, असं कानावर येतंय. म्हणूनच पुन्हा एकदा आम्ही स्पष्ट शब्दात इशारा देतोय की फक्त मुंबईच काय, हिंदुस्थानातील कोणत्याही भाषेतल्या कलाकृतीत पाकिस्तानी कलाकार दिसला तर त्याचे गंभीर परिणाम संबंधित निर्मात्यांना भोगावे लागतील.' असं ट्वीट अमेय खोपकर यांनी काही महिन्यांपूर्वी केलं होतं. 

'द लेजेंड ऑफ मौला जट्ट' या पाकिस्तानी चित्रपटाचा विरोध देखील अमेय खोपकर यांनी केला होता.  'नाही म्हणजे नाहीच. फवाद खानचे जे कुणी देशद्रोही फॅन्स असतील त्यांनी खुशाल पाकिस्तानमध्ये जाऊन सिनेमा बघावा.' असं ट्वीट अमेय खोपकर यांनी केले होते. 

माहिरा खान,वीना मलिक, सबा कमर या पाकिस्तानी अभिनेत्रींनी हिंदी चित्रपटसृष्टीत काम केले. तसेच अली जफर पाकिस्तानी अभिनेत्यानं देखील बॉलिवूडमध्ये काम केले. 

वाचा इतर महत्वाच्या बातम्या: