Shrigonda Assembly constituency : विधानसभेची खडाजंगी : श्रीगोंद्यात भाजपकडून प्रतिभा पाचपुतेंची उमेदवारी जाहीर, मविआत मात्र रस्सीखेच सुरु
Maharashtra Assembly Election 2024 : भारतीय जनता पक्षाने विधानसभा निवडणुकांची पहिली उमेदवारी यादी जाहीर केली.
Shrigonda Assembly constituency 2024 : भारतीय जनता पक्षाने विधानसभा निवडणुकांची पहिली उमेदवारी यादी जाहीर केली. ज्यामध्ये विद्यमान आमदार बबनराव पाचपुते यांच्या पत्नी प्रतिभा पाचपुते यांना उमेदवारी देण्यात आले आहे. विद्यमान आमदार बबनराव पाचपुते आजारी असल्यामुळे त्यांच्या जागी पत्नी प्रतिभा पाचपुते यांना तिकीट देण्यात आले आहे. दुसरीकडे महाविकास आघाडीकडून मात्र अद्याप कोणालाही उमेदवारी देण्यात न आल्याने पाचपुतेंसमोर कोणाचे आव्हान असणार? हे पाहणे महत्वाचे ठरणार आहे.
अहमदनगर जिल्ह्यातील महत्वाचा मतदार संघ म्हणजे श्रीगोंदा विधानसभा. श्रीगोंद्याचे राजकारण पाचपुते, नागवडे, जगताप या बड्या नावांभोवती फिरत असते. बबनराव पाचपुते हे श्रीगोंद्याचे विद्यमान आमदार आहेत. आता होणाऱ्या निवडणुकीतही भाजपने पुन्हा पाचपुते कुटुंबामध्येच उमेदवारी दिली आहे. दुसरीकडे महाविकास आघाडीमध्येही श्रीगोंद्यातून लढण्यासाठी अनेक नेते इच्छुक आहेत. महाविकास आघाडीमध्ये राष्ट्रवादी काँग्रेसचे राहुल जगताप, शिवसेना ठाकरे गटाचे साजन पाचपुते आणि काँग्रेसकडून घनश्याम शेलार इच्छुक आहेत. त्यामुळे सध्यातरी याठिकाणी महाविकास आघाडीत रस्सीखेच सुरु असल्याचे दिसत आहे.
याआधी 2019 च्या विधानसभा निवडणुकीत श्रीगोंद्यामध्ये भाजप विरुद्ध राष्ट्रवादी असा सामना रंगला होता. या निवडणुकीत भाजपचे उमेदवार बबनराव पाचपुते 1,03,258 मतांनी विजयी झाले होते. तर राष्ट्रवादीचे उमेदवार घनश्याम प्रतापराव शेलार यांना 4,750 मतांनी पराभव स्वीकारावा लागला होता. तर 2014 च्या विधानसभा निवडणुकीत राष्ट्रवादी काँग्रेस आणि भाजपमध्ये चुरशीचा सामना रंगला होता. राष्ट्रवादी कॉंग्रेसचे उमेदवार राहुल जगताप 99,281 मतांनी विजयी झाले होते. तर भाजपचे बबनराव पाचपुते 13,637 मतांनी पराभूत झाले होते. त्यामुळे या निवडणुकीत कोण बाजी मारणार हे पाहणे महत्वाचे ठरणार आहे.
महत्त्वाच्या बातम्या
ट्रेंडिंग न्यूज
