KDMC : भाजप आणि शिंदेंकडून संपर्क, सन्मानजनक प्रस्ताव आल्यास विचार करू; ठाकरेचे नगरसेवक मोठा निर्णय घेणार
KDMC Election: मनसेने या आधीच शिंदे गटाला पाठिंबा दिला आहे. त्यानंतर शिवसेनेच्या सात नगरसेवकांनी उद्धव ठाकरेंशी चर्चा केली. शिंदे आणि भाजपकडून ठाकरेंच्या नगरसेवकांशी संपर्क साधण्याचा प्रयत्न सुरू आहे.
मुंबई : कल्याण डोंबिवली महापालिकेमध्ये मोठ्या घडामोडी घडताना दिसत असून ठाकरेंचे सात नगरसेवक आता मोठा निर्णय घेण्याच्या तयारीत आहेत. भाजप आणि शिंदेंच्या शिवसेनेकडून आमच्याशी संपर्क साधण्याचा प्रयत्न केला जात आहे. कोणताही सन्मानजनक प्रस्ताव आल्यास आम्ही त्यावर विचार करु असं मोठं वक्तव्य ठाकरेंच्या नगरसेवकांनी केलं. पक्षप्रमुख उद्धव ठाकरे यांच्याशी चर्चा केल्यानंतर या नगरसेवकांनी हे वक्तव्य केलं आहे.
मनसेने कल्याण डोंबिवली महानगरपालिकेमध्ये शिवसेना शिंदे गटाला मनसेच्या पाच नगरसेवकांनी पाठिंबा दिला. तसेच ठाकरेंच्या चार नगरसेवकांनीही शिंदेंना पाठिंबा दिला. त्यानंतर ठाकरेंच्या शिवसेनेच्या कल्याण डोंबिवलीमधील नगरसेवकांनी उद्धव ठाकरे यांची मातोश्रीवर भेट घेतली. कल्याण महापालिकेतील घडामोडींवर त्यांनी उद्धव ठाकरेंसोबत चर्चा केली.
सन्मानजनक प्रस्तावावर विचार
भाजप आणि शिंदे यांच्या शिवसेनेकडून कल्याण डोंबिवलीमध्ये ठाकरेंच्या नगरसेवकांना संपर्क करण्यात येत आहे. सन्मानजनक प्रस्ताव दिल्यास आम्ही याबाबत विचार करू असं वक्तव्य ठाकरेंचे गटनेते उमेश बोरगावकर यांनी केलं.
कल्याण डोंबिवली महाालिका निवडणुकीत शिवसेना ठाकरे गटाने मनसेसोबत युती करून निवडणूक लढवली. त्यामध्ये त्यांचे 11 आणि मनसेचे 5 नगरसेवक निवडून आले. परंतु, शिवसेना शिंदे गटाने ठाकरेंचे चार नगरसेवक गळाला लावल्याने ठाकरेंकडे सात नगरसेवक शिल्लक राहिले. या सात नगरसेवकांनी त्यांच्या गटाची नोंदणी केली आणि उमेश बोरगावकरांना गटनेता म्हणून घोषित केलं.
अंतिम निर्णय उद्धव ठाकरे घेणार
शिवसेनेच्या सात नगरसेवकांनी उद्धव ठाकरेंची भेट घेतली आणि त्यांनी कल्याण डोंबिवलीमधील घडामोडींची माहिती दिली. शिंदे गट आणि भाजपकडून आपल्याशी संपर्क केला जात असल्याची माहिती त्यांनी दिली. यावेळी तसा काही प्रस्ताव आल्यानंतर काय करायचं याचं मार्गदर्शन त्यांनी उद्धव ठाकरे यांच्याकडून घेतलं. भाजप किंवा शिंदेंकडून ठाकरेंच्या शिवसेनेला काही प्रस्ताव आल्यास त्यावर अंतिम निर्णय हा उद्धव ठाकरे घेणार असल्याची माहिती आहे.
मनसेचा शिंदेंना पाठिंबा
दुसरीकडे, उद्धव ठाकरेंसोबत एकत्र लढलेल्या मनसेने मात्र कल्याण डोंबिवलीमध्ये शिंदेंच्या शिवसेनेला पाठिंबा जाहीर केला आहे. मनसेचे पाच नगरसेवक असून त्यांनी शिंदेना पाठिंबा दिला. लोकांची कामं करायची असतील, मतदारांनी दाखवलेला विश्वास कामाच्या स्वरुपात सार्थ करायचा असेल तर सत्तेला चिकटल्याशिवाय पर्याय नाही असं वक्तव्य मनसेचे माजी आमदार राजू पाटील यांनी केलं.
ही बातमी वाचा:
महत्त्वाच्या बातम्या
