Pune Crime: 'मुली बऱ्या करायच्या असतील तर सगळी संपत्ती विका', महिला मांत्रिकाने IT Engineer ला 14 कोटींना लुटले

पुण्यातील (Pune) आयटी इंजिनियर (IT Engineer) दीपक डोळस (Deepak Dolas) यांची तब्बल १४ कोटी रुपयांची फसवणूक झाल्याची धक्कादायक घटना समोर आली आहे. वेदिका पंढरपूरकर (Vedika Pandharpurkar) नावाच्या एका भोंदू महिला मांत्रिकाने त्यांच्या दिव्यांग मुलींना बरे करण्याच्या नावाखाली ही फसवणूक केली. 'तुमच्या मुलींचा आजार बरा होईल आणि त्यासाठी सगळी संपत्ती विका आणि पैसे मला द्या', अशी मागणी करत वेदिका पंढरपूरकर हिने डोळस कुटुंबाचा विश्वास संपादन केला. आपल्या अंगात शंकर महाराज संचारत असल्याचा दावा तिने केला होता. या अंधश्रद्धेला बळी पडून, डोळस यांनी इंग्लंडमधील (UK) घर, पुण्यातील मालमत्ता आणि गावची शेतजमीन विकून मिळालेली सर्व रक्कम वेदिकाला दिली. मात्र, मुलींच्या प्रकृतीत काहीच सुधारणा न झाल्याने आपली फसवणूक झाल्याचे त्यांच्या लक्षात आले. या प्रकरणामुळे एकेकाळी उच्च पदावर काम करणाऱ्या डोळस कुटुंबावर आज भाड्याच्या घरात राहण्याची वेळ आली असून, त्यांनी पुणे पोलिसांकडे (Pune Police) कारवाईची मागणी केली आहे.