Pune Land Deal : '…तर पार्थ पवारांवर गुन्हा दाखल करा', अंबदास दानवेंची मागणी; चौकशीसाठी समिती गठीत

पुण्यातील कोरेगाव पार्क येथील वादग्रस्त जमीन व्यवहार प्रकरणी पार्थ पवार यांच्या अडचणीत वाढ झाली आहे. या प्रकरणी उपमुख्यमंत्री अजित पवार, प्रफुल्ल पटेल आणि सुनील तटकरे यांनी मुख्यमंत्री देवेंद्र फडणवीस यांची भेट घेतली. 'जमिनीचे जे दोषी आहेत, पार्थ पवार सहित सगळे, या सगळ्यांवर गुन्हा दाखल झाला पाहिजे,' अशी मागणी ठाकरे गटाचे नेते अंबादास दानवे यांनी केली आहे. महसूल विभागाचे अप्पर मुख्य सचिव विकास खारगे यांच्या अध्यक्षतेखाली सहा सदस्यीय चौकशी समिती गठीत करण्यात आली असून, महिन्याभरात अहवाल सादर करण्याचे निर्देश देण्यात आले आहेत. या प्रकरणात शीतल तेजवानी यांच्यासह नऊ जणांवर गुन्हा दाखल झाला आहे, ज्यात पार्थ यांचे मामेभाऊ दिग्विजय पाटील यांचा समावेश आहे. कंपनीत दिग्विजय पाटील यांची केवळ एक टक्का भागीदारी असताना, ९९ टक्के भागीदार असलेल्या पार्थ पवारांवर कारवाई का नाही, असा प्रश्न विरोधक विचारत आहेत. शीतल तेजवानी आणि त्यांचे पती सागर सूर्यवंशी यांच्यावर सेवा विकास बँकेतील ४१ कोटींच्या कर्ज घोटाळ्याचाही आरोप आहे.