Patil on Party Ownership: 'राष्ट्रवादी पवारांची, शिवसेना ठाकरेंची', चंद्रकांत पाटलांच्या वक्तव्याने भाजपच्या भूमिकेवर प्रश्नचिन्ह

सांगली जिल्ह्यातील तासगाव येथे बोलताना मंत्री चंद्रकांत पाटील यांनी केलेल्या एका विधानामुळे महाराष्ट्राच्या राजकारणात नव्या चर्चेला तोंड फुटले आहे. शिवसेना आणि राष्ट्रवादी काँग्रेसमधील फुटीनंतर पक्ष कोणाचा हा वाद सुरू असतानाच पाटलांनी हे वक्तव्य केले. 'राष्ट्रवादी हा पक्ष शरद पवारांचा, तर शिवसेना उद्धव ठाकरेंचा पक्ष,' असे चंद्रकांत पाटील म्हणाले. त्यांनी भाजपची भूमिका स्पष्ट करताना म्हटले की, भाजप हा कार्यकर्त्यांचा पक्ष असून तो कोणा एका व्यक्तीच्या मालकीचा नाही. तो अटलबिहारी वाजपेयी, लालकृष्ण अडवाणी किंवा नरेंद्र मोदी यांचा पक्ष नसून कार्यकर्त्यांचा पक्ष आहे, असेही ते म्हणाले. त्यांच्या या विधानामुळे राजकीय वर्तुळात विविध प्रतिक्रिया उमटत असून, विशेषतः भाजपच्या मित्रपक्षांमध्ये अस्वस्थता निर्माण होण्याची शक्यता वर्तवण्यात येत आहे.