Railway Protest: रेल्वे आंदोलन भोवले, दोन प्रवाशांचा मृत्यू, तरी प्रशासनाकडून कारवाई का नाही?

मध्य रेल्वेच्या (Central Railway) कर्मचाऱ्यांनी केलेल्या आंदोलनामुळे मुंबईत (Mumbai) दोन प्रवाशांचा मृत्यू झाला असून तीन जण जखमी झाले आहेत. मध्य रेल्वेने, 'चौकशी करून अहवाल आल्यावरती कारवाई करू,' असे सांगितले असले तरी, अद्याप कोणतीही ठोस कारवाई किंवा चौकशी समिती स्थापन केलेली नाही, ज्यामुळे प्रवासी संघटनांनी तीव्र नाराजी व्यक्त केली आहे. ही घटना ६ नोव्हेंबर रोजी सायंकाळी छत्रपती शिवाजी महाराज टर्मिनस (CSMT) येथे रेल्वे कर्मचाऱ्यांनी केलेल्या आंदोलनानंतर घडली. आंदोलनामुळे लोकल सेवा ठप्प झाल्याने प्रवाशांनी रेल्वे रुळावरून चालत जाण्याचा निर्णय घेतला, त्याचवेळी सँडहर्स्ट रोड (Sandhurst Road) स्थानकाजवळ एका वेगवान लोकलने त्यांना धडक दिली. मुंब्रा येथे जून महिन्यात झालेल्या अपघाताप्रकरणी दोन रेल्वे अभियंत्यांवर गुन्हा दाखल केल्याच्या निषेधार्थ हे आंदोलन करण्यात आले होते.