Coronavirus | देशातील कोरोना बाधितांचा आकडा 2 लाखांच्या उंबरठ्यावर; गेल्या 24 तासांत 204 मृत्यू

भारतात कोरोनाचा वाढता प्रादुर्भाव दिसून येत आहे. भारतातील कोरोनाग्रस्तांचा आकडा दोन लाखांच्या उंबरठ्यावर पोहोचला आहे. मागील 24 तासांमध्ये 8171 नवे कोरोना बाधित रुग्ण आढळून आले. तसेच 204 लोकांचा मृत्यू झाला आहे. आरोग्य मंत्रालयाने जारी केलेल्या ताज्या आकडेवारीनुसार, आतापर्यंत देशात एक लाख 98 हजार 706 कोरोना बाधित आढळून आले आहेत. तर 5598 लोकांचा मृत्यू झाला असून 95 हजार 527 रुग्ण कोरोनामुक्त झाले आहेत. महाराष्ट्र, तामिळनाडू, दिल्ली, गुजरात, राजस्थान आणि मध्यप्रदेश या राज्यांमध्ये कोरोनाचा सर्वाधिक प्रादुर्भाव दिसून येत आहे.