आयपीएल लिलावात खरेदीदार न मिळाल्याने इरफान भावूक

नवी दिल्ली : करिअरच्या सुरुवातीला ज्या खेळाडूची ऑलराऊंडर म्हणून कपिल देव यांच्याशी तुलना केली जात होती, ज्या खेळाडूच्या स्विंगने आणि फलंदाजीने संघात एक नवी उमेद भरण्याचं काम केलं होतं, त्याच खेळाडूला आयपीएल 10 मध्ये खरेदीदार मिळाला नाही. टीम इंडियाचा ऑल राऊंडर खेळाडू इरफान पठाणवर सततची दुखापत आणि अनेकदा आऊट ऑफ फॉर्म राहिल्याने ही वेळ आली आहे. आयपीएल लिलावात त्याच्यावर एकाही फ्रँचायझीने बोली लावली नाही. यानंतर इरफानने सोशल मीडियावर आपलं दुःख मांडलं आहे. चाहत्यांसाठी पुन्हा पुनरागमन करु आणि या वाईट वेळेचा संयमाने सामना करीन, असं त्याने म्हटलं आहे. इरफान पठाणची पोस्ट

‘’माझ्या पाठीला 2010 मध्ये 5 ठिकाणी फ्रॅक्चर असल्याचं समजलं. मी परत कधीच क्रिकेट खेळू शकत नाही,

क्रिकेटचं स्वप्न विसरुन जावं, असं मला डॉक्टरांनी सांगितलं होतं.

पण मी डॉक्टरांना सांगितलं की, मी कोणताही त्रास सहन करायला तयार आहे.

पण देशासाठी खेळता येतं, तो हा खेळ सोडण्याचा त्रास नाही सहन करु शकत.

मी कठिण मेहनत केली आणि पुन्हा संघात पुनरागमन केलं.

करिअरमध्ये अनेक संकटांचा सामना केला. पण कधीच पराभव पत्करला नाही.

हा माझा स्वभाव आहे, मी असंच करायला पाहिजे आणि असंच करीन.

आताही हा माझ्यासमोरचा अडथळा आहे.

पण चाहत्यांच्या आशीर्वाद आणि शुभेच्छांनी पुन्हा मी हा अडथळा पार करीन.

मला पाठिंबा देणाऱ्या माझ्या चाहत्यांना मला ही गोष्ट शेअर करायची होती.’’