पंजाबमध्ये मोठा विजय मिळवल्यानंतर 'आप'चा रोड शो; 16 मार्चला भगवंत मान घेणार मुख्यमंत्रीपदाची शपथ

kejriwal

पंजाब विधानसभा निवडणुकीत आम आदमी पक्ष प्रचंड बहुमताने विजय होत सर्वात मोठा पक्ष ठरला आहे. यानंतर आज आम आदमी पक्षाने अमृतसरमध्ये विजयी मिरवणूक काढली.

या मिरवणुकीत दिल्लीचे मुख्यमंत्री अरविंद केजरीवाल यांच्यासह राज्याचे भावी मुख्यमंत्री भगवंत मान ही सहभागी होते.

या रोड शोपूर्वी अरविंद केजरीवाल आणि भगवंत मान यांनी सुवर्ण मंदिरात माथा टेकवला. तत्पूर्वी भगवंत मान यांनी केजरीवाल आणि दिल्लीचे उपमुख्यमंत्री मनीष सिसोदिया यांचे विमानतळावर स्वागत केले. यावेळी पक्षाचे नेते राघव चढ्ढाही उपस्थित होते.

भगवंत मान हे 16 मार्च रोजी नवांशहर जिल्ह्यातील थोर स्वातंत्र्यसैनिक शहीद भगतसिंग यांचे मूळ गाव असलेल्या खटकर कलान येथे पंजाबचे मुख्यमंत्री म्हणून शपथ घेणार आहेत. 117 सदस्यीय विधानसभेत आम आदमी पक्षाने 92 जागा जिंकल्या आहेत.

नुकत्याच पार पडलेल्या विधानसभा निवडणुकीत आपने पंजाबमध्ये बाजी मारली आहे.

पंजाब विधानसभा निवडणुकीत आम आदमी पक्षाने 92 जागा जिंकल्या आहेत. पंजाबच्या राजकीय इतिहासातील कोणत्याही पक्षाचा हा सर्वात मोठा विजय आहे.