शहापूर समृद्धी महामार्गावर भीषण अपघात; परभणीच्या दोघांचा मृत्यू, 7 गंभीर जखमी; ट्रकच्या धडकेत क्रुझरचा चक्काचूर

Samruddhi Expressway Accident: शहापूर तालुक्यातील समृद्धी महामार्गावर क्रुझर जीप आणि ट्रकमध्ये झालेल्या भीषण अपघातानंतर पहाटे महामार्गावर मोठी खळबळ उडाली होती.

Accident

शहापूर तालुक्यातील समृद्धी महामार्गावर क्रुझर जीप आणि ट्रकमध्ये झालेल्या भीषण अपघातात दोन जणांचा मृत्यू झाला असून सात जण जखमी झाले आहेत.

ही दुर्घटना वाशिंद आणि आमने दरम्यान पहाटेच्या सुमारास घडली.

मृतांमध्ये अब्दुल पाशा शेख (वय 65) आणि जाहीद सिद्दिकी (वय 40) यांचा समावेश आहे. अपघातग्रस्तांमध्ये 2 लहान मुले, 3 महिला आणि 2 पुरुषांचा समावेश असून त्यातील दोन ते तीन जणांची प्रकृती चिंताजनक असल्याचे सांगण्यात येत आहे.

ही मंडळी परभणी जिल्ह्यातून भिवंडीतील नातेवाईकांकडे येत असताना हा अपघात घडला. अपघातानंतर जखमींना तात्काळ भिवंडीतील उपजिल्हा रुग्णालयात दाखल करण्यात आले.

अपघाताची माहिती मिळताच स्थानिक पोलीस आणि आपत्कालीन सेवांनी घटनास्थळी धाव घेतली. जखमींना तात्काळ भिवंडी उपजिल्हा रुग्णालयात दाखल करण्यात आले. मात्र, गंभीर जखमींना अधिक उपचारासाठी खासगी रुग्णालयात हलवण्यात आले आहे.

मृतदेहांचे पंचनामे करून शवविच्छेदनासाठी भिवंडीच्या शासकीय रुग्णालयात पाठवण्यात आले असून, या प्रकरणाचा सखोल तपास शहापूर पोलीस करीत आहेत.

या अपघातामुळे परिसरात एकच खळबळ उडाली असून, समृद्धी महामार्गावर होणाऱ्या अपघातांबाबत नागरिकांमध्ये चिंता व्यक्त होत आहे.