Pankaja Munde : दोन महिन्यांच्या राजकीय ब्रेकनंतर पंकजा मुडेंचा पहिला दौरा; ठिकठिकाणी कार्यकर्त्यांची गर्दी

Pankaja Munde : दोन महिन्यांसाठी राजकीय ब्रेक घेतल्यावर भाजप नेत्या पंकजा मुंडे पुन्हा एकदा सक्रीय झाल्या आहेत. तसेच, राज्यभरात दौरा देखील करणार आहे.

Pankaja Munde

गेल्या दोन महिन्यापासून सुट्टीवर असलेल्या पंकजा मुंडे पुन्हा एकदा सक्रीय झाल्या असून, राज्यातल्या दहापेक्षा जास्त जिल्ह्यामध्ये दौरा करणार आहेत.

विशेष म्हणजे, हा दौरा केवळ देवदर्शनासाठी असेल असे पंकजा मुंडे यांनी जाहीर केले आहे.

आजपासून पंकजा मुंडे यांच्या या शिवशक्ती दौऱ्याची सुरवात झाली असून, महाराष्ट्रातील साडे तीन शक्तीपीठांपैकी एक असलेल्या कुलदैवत माहूर गड येथे श्री रेणुकामातेच्या दर्शन त्या घेणार आहे.

पंकजा मुंडेंच्या शिवशक्ती दौऱ्यामध्ये पाच हजार किलोमीटरचा प्रवास त्या करणार आहेत.

या काळात त्या औरंगाबाद, नाशिक, अहमदनगर,पुणे, सातारा, कोल्हापूर या जिल्ह्यातील देवदर्शनासाठी दौऱ्यावर जाणार आहेत.

दरम्यान, माहूरगड येथील नियोजित दौऱ्यावर जात असताना अर्धापूर, वारांगा फाटा, हातगाव येथे कार्यकर्ते व पदाधिकाऱ्यांनी उत्साहात पंकजा मुंडे यांचे स्वागत केले.

यावेळी महिला कार्यकर्त्यांची देखील मोठी गर्दी पाहायला मिळाली. तर या महिला कार्यकर्त्यांनी मोठा हार पंकजा मुंडे यांच्या गाळ्यात घालून त्यांचे स्वागत केले.

तर याचवेळी अनेक तरुण कार्यकर्ते देखील पंकजा मुंडेंच्या स्वागतासाठी मोठ्या प्रमाणात उपस्थित असल्याचे पाहायला मिळाले. तर अनेकजण पंकजा ताई यांच्यासोबत सेल्फी घेण्यासाठी गर्दी करतांना पाहायला मिळाले.