Beed News: बीडमध्ये आंदोलनाची धग वाढण्याचे संकेत, जिल्हाधिकाऱ्यांचा महत्त्वाचा निर्णय; आज मध्यरात्रीपासून 28 तारखेपर्यंत जमावबंदी
Santosh Deshmukh case: बीड जिल्ह्यात आज मध्यरात्रीपासून जमावबंदीचे आदेश लागू होणार आहेत. त्यामुळे सार्वजनिक ठिकाणी एकत्र जमण्यास मज्जाव असेल. आंदोलनाची धग वाढण्याची शक्यता.
बीड: मस्साजोग गावचे सरपंच संतोष देशमुख हत्याप्रकरणावरुन गेल्या काही दिवसांपासून बीड जिल्ह्यातील राजकीय आणि सामाजिक वातावरण चांगलेच तापले आहे. याप्रकरणात अटक करण्यात आलेल्या आरोपींवर मोक्का कायदा लावण्यात आला आहे. केवळ वाल्मिक कराड याच्यावरच फक्त खंडणीचा गुन्हा दाखल आहे. मात्र, वाल्मिक कराडलाही मोक्का लावून त्याच्यावर 302 कलमातंर्गत कारवाई करा, असा आग्रह धरण्यात आला आहे. या मु्द्द्यावरुन विरोधक आणि देशमुख कुटुंबीयांना आंदोलन सुरु केले आहे. यामध्ये मराठा आंदोलक मनोज जरांगे हेदेखील सातत्याने सहभागी होत आहेत. येत्या काही दिवसांमध्ये या आंदोलनाची धग वाढण्याची शक्यता असल्याने आता बीड जिल्ह्यात जमावबंदीचे आदेश लागू करण्याचा निर्णय घेण्यात आला आहे. मनोज जरांगे पाटील यांच्या प्रस्तावित आंदोलनाच्या पार्श्वभूमीवरती बीड जिल्ह्यात 14 तारखेपासून 28 तारखेपर्यंत जमावबंदी राहणार आहे.
प्राथमिक माहितीनुसार, विविध आरक्षण आंदोलनाची दाहकता लक्षात घेता बीड जिल्ह्यामध्ये जमावबंदीचे आदेश लागू करण्यात आलेले आहेत. आज मध्यरात्रीपासून 28 तारखेपर्यंत हे आदेश लागू असणार आहेत. त्यानुसार जिल्ह्यात सार्वजनिक ठिकाणी पाच किंवा त्यापेक्षा अधिक व्यक्तींना मोर्चे निदर्शने आंदोलने धरणे करण्यासाठी जमावास परवानगी शिवाय एकत्र येता येणार नाही. बीडचे अप्पर जिल्हा दंडाधिकारी शिवकुमार स्वामी यांनी हे आदेश पारित केले आहेत.
आमच्याकडे सगळे पुरावे, वाल्मिक कराडवर 302 अंतर्गत गुन्हा दाखल करा: धनंजय देशमुख
सरपंच संतोष देशमुख यांचे बंधू धनंजय देशमुख हे मंगळवारी एसआयटी पथकाचे प्रमुख डॉ. बसवराज तेली यांची भेट घेणार आहेत.
आम्ही आज तेली साहेबांची भेट घेणार आहोत. खंडणी ते खून प्रकरण यातील ते कटकारस्थान करणारे जे आरोपी आहेत त्यांना मोक्का अंतर्गत कारवाई करून 302 अंतर्गत फाशी लावावी ही माझी मागणी असल्याचे धनंजय देशमुख यांनी म्हटले.
य सगळ्याचे पुरावे आमच्याकडे आहेत. माझ्या भावाची हत्या ही खंडणीच्या प्रकरणामुळे झाली. त्यामुळे आमची मागणी आहे की, दोन्ही प्रकारणाचे आरोपी एकाच आहेत. एसआयटी पथकात आम्ही दोन नावं सुचवली होती. मात्र, त्यांचा अद्याप पथकात समावेश झालेला नाही. नवीन SIT मधील कोणत्याही अधिकाऱ्यावर आमचा आक्षेप नाही, असे धनंजय देशमुख यांनी स्पष्ट केले.
वाल्मिक कराडला केज कोर्टात हजर करणार
खंडणी प्रकरणातील आरोपी वाल्मिक कराड याची 14 दिवसांची पोलीस कोठडी संपत असल्यामुळे मंगळवारी त्याला केज येथील सत्र न्यायालयात हजर केले जाणार आहे. तत्पूर्वी वाल्मिक कराड याची वैद्यकीय तपासणीसाठी बीड शहर पोलीस ठाण्यात डॉक्टर दाखल झाले आहेत. थोड्याचवेळात वाल्मिक कराड यांना केज न्यायालयात नेले जाईल.
आणखी वाचा
महत्त्वाच्या बातम्या
ट्रेंडिंग न्यूज
