सुरक्षेच्या लवाजम्यात वावरणारे राहुल गांधी बाईकचे शौकीन, त्यांच्याकडे आहे 'ही' स्पोर्ट्स बाईक

Rahul Gandhi Bike: महागड्या गाड्या वापरणारे काँग्रेस नेते राहुल गांधी बाईक्सचेही शौकीन आहेत. याबाबत त्यांनी स्वतः भाष्य केलं आहे.

Rahul Gandhi

काही दिवसांपूर्वी दिल्लीच्या करोलबागमध्ये राहुल गांधींचे मेकॅनिकसोबतचे फोटो सोशल मीडियावर व्हायरल झाले होते. यावेळी ते स्वतः बाईक दुरुस्त करताना दिसले होते. याचा एक व्हिडीओ समोर आला आहे, ज्यामध्ये राहुल गांधी त्यांच्याकडे केटीएम बाईक असल्याचं त्यांनी स्वतः बोलताना सांगितलं आहे.

राहुल गांधींच्या यूट्यूब चॅनलवरुन शेअर केलेल्या या व्हिडीओमध्ये राहुल गांधी म्हणतात, "माझ्याकडेही KTM 390 बाईक आहे, पण ती तिथेच पडून आहे. माझ्या सिक्युरिट असणारे मला बाईक चालवू देत नाहीत, लगेच पत्र लिहायला सुरुवात करतात."

यावेळी राहुल गांधी यांनी मेकॅनिकला सांगितलं की, ते कसं काम करतात ते पाहण्यासाठी आलो आहे. यादरम्यान राहुल गांधींनी मेकॅनिकच्या दुकानात रिपेअरिंगसाठी आलेली बाईकही दुरुस्त केली होती.

राहुल गांधी गेल्या वर्षी भारत जोडो यात्रेदरम्यान बाईकवर स्वार झाल्याचं पाहायला मिळालं होतं. त्यावेळचे त्यांच फोटोही सोशल मीडियावर व्हायरल झाले होते.

काही दिवसांपूर्वी राहुल गांधींनी हरियाणात सोनीपतमध्ये शेतात ट्रॅक्टर चालवला होता. दिल्लीहून शिमल्याला जाताना रस्त्यात त्यांना शेतकरी दिसले होते. राहुल गांधींनी त्यांची भेट घेतली. त्यावेळी ट्रॅक्टर चालवण्याचा मोह त्यांना आवरता आला नाही आणि शेतकऱ्यांसोबत त्यांनी पेरणीही केली.

गेल्या वर्षी भारत जोडो यात्रेत राहुल गांधी सायकलही चालवताना दिसले होते. मध्य प्रदेशातील इंदूरमध्ये त्यांनी सायकल चालवली.

एरव्ही सुरक्षेच्या लवाजम्यात वावरणारे राहुल गांधी बहुतेक वेळा कारमधून ये-जा करताना दिसतात. फार कमी प्रसंग असतील जेव्हा ते बाईक, सायकल किंवा ट्रॅक्टर चालवताना दिसलेत. मात्र यावेळचे त्यांचे फोटो सोशल मीडियावर प्रचंड व्हायरल झाले होते.