Beed News : बीडमध्ये DPDC बैठकीवेळी धनंजय मुंडेंच्या भावाला पोलिसांनी गेटवरच रोखलं; जिल्हाधिकारी कार्यालयाबाहेर नेमकं काय घडलं?
Beed News : उपमुख्यमंत्री अजित पवारांच्या उपस्थितीत बीडमध्ये डीपीडीसीची बैठक सुरु असताना धनंजय मुंडे यांच्या भावाला गेटवरच रोखण्यात आले.
Beed News : बीड येथील मस्साजोग गावचे सरपंच संतोष देशमुख यांच्या हत्या प्रकरणाने (Santosh Deshmukh Case) जिल्ह्याचे राजकारण चांगलेच ढवळून निघाले आहे. त्यातच उपमुख्यमंत्री अजित पवार (Ajit Pawar) हे बीड पालकमंत्री झाल्यानंतर आज गुरुवारी (दि. 30) पहिल्यांदाच बीडच्या दौऱ्यावर आले असून बीडमध्ये डीपीडीसीची बैठक (Beed DPDC) पार पडत आहे. ही बैठक वादळी ठरण्याची शक्यता असून बैठकीस सर्वसामान्यांना निर्बंध घालण्यात आले आहेत. दरम्यान, मंत्री धनंजय मुंडे (Dhananjay Munde) यांचे चुलत भाऊ अजय मुंडे (Ajay Munde) यांना देखील गेटवरच रोखण्यात आल्याचे पाहायला मिळाले.
अजित पवार हे गुरुवारी सकाळी जिल्हा नियोजन समितीच्या बैठकीसाठी बीडमध्ये दाखल झाले आहेत. यावेळी परळीतील राष्ट्रवादी काँग्रेसच्या कार्यालयात अजित पवार यांचे मंत्री धनंजय मुंडे यांनी स्वागत केले. यावेळी अजित पवार यांनी राष्ट्रवादीच्या कार्यकर्त्यांशी संवाद साधताना बीड जिल्ह्यातील गुन्हेगारी, खंडणीखोरी खपवून घेतली जाणार नाही, असा इशारा दिला आहे. यानंतर अजित पवार हे बीड जिल्हाधिकारी कार्यालयात डीपीडीसी बैठकीसाठी दाखल झाले.
अजय मुंडे आल्या पावली माघारी
आज बीडच्या जिल्हाधिकारी कार्यालयात पालकमंत्री अजित पवार यांच्या उपस्थितीत बैठक होत असताना या बैठकीस हजर राहण्यासाठी सर्वसामान्यांना निर्बंध घालण्यात आले आहेत. सरपंच संतोष देशमुख हत्या प्रकरणानंतर बीडचे पोलीस प्रशासन अलर्ट झाल्याचे पाहायला मिळत आहे. त्यातच धनंजय मुंडे यांचे चुलत भाऊ अजय मुंडे हे जिल्हा कार्यालय परिसरात आले असता त्यांना गेटवरच रोखण्यात आले. त्यामुळे अजय मुंडे यांना आल्या पावली माघारी परतावे लागले आहे. संतोष देशमुख हत्या प्रकरण झाल्यानंतर बीडचे पोलीस प्रशासन अलर्ट असून कोणताही अनुचित प्रकारे घडू नये, यासाठी योग्य ती खबरदारी घेतली जात आहे.
अजित पवारांनी घेतला विकासकामांचा आढावा
दरम्यान, जिल्हा नियोजन समितीच्या बैठकीत आमदारांनी मतदार संघनिहाय बैठकीत झालेल्या कामाची माहिती समिती समोर ठेवली. नमिता मुंदडा यांनी केज विधानसभा मतदारसंघातील विकासकामांचे यापूर्वी जे नियोजन झाले होते, त्यात कोणते काम होणे बाकी आहेत आणि नव्याने कोणते करावे, यासंदर्भातली माहिती अजित पवार यांना दिली. तर सुरेश धस यांनी आष्टी विधानसभा मतदारसंघातील विकासकामाच्या यापूर्वीच्या आराखड्याची माहिती देऊन कोणते काम होणे बाकी आहेत आणि यापुढे कोणते काम व्हावे, संदर्भात माहिती मांडली.
आणखी वाचा
महत्त्वाच्या बातम्या
