नो सेक्स, नो मॅरेज नो डेटिंग...डोनाल्ड ट्रम्प निवडून येताच महिलांमध्ये '4B मुव्हमेंट'ची तुफान चर्चा; अमेरिकेत नेमकं चाललंय तरी काय?
सध्या अमेरिकेत 4b movement ची चांगलीच चर्चा आहे. या मुव्हमेंटच्या माध्यमातून महिलांमध्ये नो सेक्स, नो डेटिंग, नो मॅरेज आणि नो चाईल्ड याबाबत चर्चा केली जात आहे.
न्यूयॉर्क : अमेरिकेत आता पुन्हा एकदा डोनाल्ड ट्रम्प यांचं सरकार आलं आहे. हे सरकार येताच अमेरिकेत 4B मुव्हमेंटची चर्चा चालू झाली आहे. विशेषत: महिला या 4B आंदोलनाला पाठिंबा देताना दिसतायत. याच पार्श्वभूमीवर ही 4B मुव्हमेंट नेमकी काय आहे? या आंदोलनाचा उगम नेमका काय आहे? या आंदोलनाच्या माध्यमातून महिला नेमकी काय मागणी करत आहेत? हे जाणून घेऊ या...
डोनाल्ड ट्रम्प सत्तेत येताच 4B आंदोलनाची चर्चा
डोनाल्ड ट्रम्प हे अमेरिकेचे नवे राष्ट्राध्यक्ष होणार, हे स्पष्ट झाल्यानंतर अमेरिकेत अनेक महिलांमध्ये या 4B मुव्हमेंटची चर्चा सुरू झाली होती. 2022 साली अमेरिकेच्या सर्वोच्च न्यायालयाने गर्भपातासंदर्भात मोठा निर्णय दिला. या निर्णयाअंतर्गत रो विरुद्ध वेड या खटल्यातील निर्णय बदलून महिलांना गर्भपाताचा असलेला राष्ट्रीय अधिकार संपुष्टात आणण्यात आला. सर्वोच्च न्यायालयाच्या याच निर्णयाचे श्रेय घेण्याचा प्रयत्न डोनाल्ड ट्रम्प यांनी केला होता. त्यामुळेच ट्रम्प यांना विरोध म्हणून अमेरिकेच्या महिलांत 4B मुव्हमेंटची चर्चा चालू झाली आहे.
4B आंदोलन नेमकं काय आहे?
खरं म्हणजे या आंदोलनाची सुरुवात दक्षिण कोरियात 2019 साली झाली होती. 4B म्हणजे दक्षिण कोरियातील एकूण चार शब्द आहेत. त्याचं इंग्रजित भाषांतर करायचं झाल्यास 4 NO असं करता येईल.
4B मधील चार ते चार शब्द कोणते?
बिहोन (Bihon)- म्हणजे भिन्नलिंगी म्हणजेच पुरुषाशी लग्न करायचं नाही.
बिकुलसन (Bichilsan- कोणतही मुल नाही
बियोनाए (Biyeonae)- पुरुषांसोबत डेटिंगला जायचं नाही
बिसेकसेउ (Bisekseu)- भिन्निलिंगी म्हणजेच पुरुषासोबत लैंगिक संबंध ठेवायचे नाही
महिलांना सन्मान मिळावा म्हणून आंदोलनाचा जन्म
म्हणजेच 4B आंदोलनाला पाठिंबा देणाऱ्या महिला डेटिंग, लग्न, लैंगिक संबंध, मूल जन्माला घालण्याविरोधी भूमिका घेताना दिसतात. लग्नानंतर महिलांवर संसाराचं ओझं येतं. त्यांच्यावर अनेक गोष्टी लादल्या जातात. त्यामुळेच नोकरी आणि संसार असं दोन्ही सांभाळून महिलांची फरफट होते. हीच हालअपेष्टा थांबावी, महिलांना सन्मान मिळावा म्हणून या आंदोलनाचा जन्म झाला.
दक्षिण कोरियातून आंदोलनाला सुरुवात
दक्षिण कोरियामध्ये हे आंदोलन 2010 ते 2016 या काळात चांगलेच फोफावले होते. या काळात महिलांसोबत होणारी हिंसा, लैंगिक असमानता याचे प्रमाण लक्षणीय रित्या वाढले होते. याच काळात #MeToo आंदोलनाचीही जगभरात विस्तार झाला होता. याच काळात दक्षिण कोरियात हे 4B आंदोलन वाढले होते. या आंदोलनामुळे महिला किती सुरक्षित आहेत? महिलांना कोणते अधिकार देण्यात आलेले आहेत? अशा प्रश्नांवर दक्षिण कोरियात नव्याने चर्चा चालू झाली होती.
पितृसत्ताक समाजव्यवस्थेला आंदोलनातून विरोधक
या आंदोलनाच्या माध्यमातून पितृसत्ताक समाजव्यवस्था आणि सामाजिक असमानता याला थेट आव्हान देण्यात आले. पारंपरिक विवाहपद्धती, मातृत्त्व याला नकार देत महिला एका प्रकारे स्वत:च्या अधिकारासाठीच संघर्ष करत आहेत. महिलांचे होत असलेल्या शोषणाचा आवाज म्हणूनही या आंदोलनाकडे पाहिले जात आहे.
हेही वाचा :
महत्त्वाच्या बातम्या
ट्रेंडिंग न्यूज
