Salman Rushdie : सलमान रश्दी यांच्यावर हल्ला करणाऱ्यावर गुन्हा दाखल, खुनाचा प्रयत्न केल्याच्या आरोप
Salman Rushdie attack : जगप्रसिद्ध लेखक सलमान रश्दी (Salman Rushdie) यांच्यावर न्यूयॉर्कमध्ये शुक्रवारी रात्रीच्या सुमारास हल्ला झाल्याची धक्कादायक माहिती समोर आली आहे.
Author Salman Rushdie attack : लेखक सलमान रश्दी (Salman Rushdie) यांच्यावर प्राणघातक हल्ला करणाऱ्या आरोपीला अटक करण्यात आली असून त्याच्यावर खुनाचा प्रयत्न केल्याच्या आरोपाखाली गुन्हाही दाखल करण्यात आला आहे. न्यूजर्सी येथील 24 वर्षीय आरोपी हादी मतार (Hadi Matar) याच्यावरील गुन्हा सिद्ध झाल्यास त्याला 15 वर्षांचा तुरुंगवास होऊ शकतो.
"सलमान यांच्यावरील हल्ल्यासाठी जबाबदार आरोपी हादी मतार याच्यावर आता हत्येचा प्रयत् केल्याचा औपचारिक आरोप ठेवण्यात आला आहे. त्याला शुक्रवारी रात्री विना जामीन अटक करण्यात आलं आहे." असं वकील जेसन श्मिट यांनी एका निवेदनात म्हटले आहे. संबधित आरोपी हा बनावट लायसन घेऊन जवळपास 650 किमी दूरहून ड्राईव्ह करुन आल्याचंही तपासात समोर आलं आहे.
🚨 BREAKING: The man suspected of attacking Salman Rushdie on Friday has been charged with attempted murder and assault
— Telegraph World News (@TelegraphWorld) August 13, 2022
This is a breaking story, more follows https://t.co/vLsDSXSOid
रश्दी यांना गंभीर दुखापत
सलमान रश्दी यांच्या प्रकृतीबाबत समोर आलेल्या माहितीत त्यांना गंभीर दुखापत झाल्याचं समोर आलं आहे. त्यांना एक डोळा गमवावा लागू शकतो असंही समोर आलं असून त्यांच्या यकृतावर चाकूने वार झाल्याचंही समोर आलं आहे. ते शुक्रवारी रात्री व्हेटिंलेटरवर असल्याचंही सांगण्यात आलं आहे.
व्याख्यानापूर्वी झाला हल्ला
न्यूयॉर्कमधील चौटौका येथे व्याख्यानापूर्वी स्टेजवर रश्दी यांच्यावर चाकूने वार करण्यात आले असून त्यात ते जखमी झाले आहे. शुक्रवारी सकाळी व्याख्यान देण्यापूर्वी CHQ 2022 कार्यक्रमाच्या मंचावर असताना 75 वर्षीय सलमान रश्दी यांच्यावर हा जीवघेणा हल्ला करण्यात आला आहे. मिडनाईट्स चिल्ड्रन (Midnight's Children) तसंच द सॅटेनिक व्हर्सेस (The Satanic Verses) ही सलमान रश्दी यांची गाजलेली पुस्तकं आहेत.
'द सॅटेनिक व्हर्सेस' या पुस्तकामुळे वादात
सलमान रश्दी हे एक जागतिक किर्तीचे लेखक असून बुकर पुरस्काराने त्यांना सन्मानित देखील करण्यात आलं आहे. दरम्यान त्यांनी लिहिलेल्या द सॅटेनिक व्हर्सेस या पुस्तकामुळे मोठ्या प्रमाणात वाद झाले होते. 1980 च्या दशकात सलमान यांच्यावर त्यांनी लिहिलेल्या पुस्तकांमुळे वाद ओढावला होता. खासकरुन मुस्लिम समाजात त्यांच्या या पुस्तकामुळे वाद झाला होता. दरम्यान द सॅटॅनिक व्हर्सेस आणि मिडनाईट चिल्ड्रन यांसारख्या पुस्कांमुळे वादाच्या भोवऱ्यात अडकलेल्या रश्दी यांच्यासाठी एका धार्मिक नेत्याने त्यांच्या हत्येचा फतवा देखील काढला होता.
कोण आहेत सलमान रश्दी?
भारतीय वंशाचे ब्रिटिश नागरिक असलेले सलमान रश्दी गेल्या 20 वर्षांपासून अमेरिकेत राहत आहेत. त्यांची पहिली कादंबरी 1975 मध्ये आली. त्यांना त्यांच्या मिडनाइट्स चिल्ड्रन (1981) साठी बुकर पारितोषिक देखील मिळाले. ही कादंबरी आधुनिक भारताबद्दल आहे. त्यांचं चौथं पुस्तक, द सॅटॅनिक व्हर्सेसमुळे (1988) त्यांना वादात अडकावे लागले होते. सलमान रश्दी यांना त्यांच्या 'द सॅटॅनिक व्हर्सेस' या पुस्तका त्यांना अनेक धमक्या देखील आल्या आहेत. या पुस्तकावर 1988 पासून इराणमध्ये बंदी घालण्यात आली आहे. पुस्तकात इस्लाम धर्माची निंदा केल्याचा आरोप करण्यात आला होता. या वादानंतर आलेल्या धमक्यांना न जुमानता त्यांनी 1990 च्या दशकात अनेक कादंबऱ्या लिहिल्या. 2007 मध्ये इंग्लंडच्या राणी दुसरी एलिझाबेथ यांनी त्यांना साहित्य क्षेत्रातील सेवांसाठी 'सर' ही पदवी प्रदान केली होती.
इतर महत्त्वाच्या बातम्या-
महत्त्वाच्या बातम्या
