Tanaji Sawant : एकही गाव सुटता कामा नये, सरसकट पंचनामे करा; तानाजी सावंतांचा पुण्यातून परंड्यातील तहसीलदारांना फोन
Tanaji Sawant: एकही गाव सुटता कामा नये, सरसकट पंचनामे करा, असे म्हणत माजी मंत्री तानाजी सावंत यांनी पुण्यातून परंड्यातील तहसीलदारांना फोनवर आदेश दिले आहेत.
Pune News : राज्यभरातील बहुतांश जिल्ह्याला मुसळधार पावसाचा फटका बसला आहे. सध्या सर्वत्र पावसाचा जोर हळूहळू कमी होण्यास सुरुवात झाली आहे. अशातच या पावसाने आतापर्यंत केलेल्या नुकसानाची दाहकता आता समोर येऊ लागली आहे. दरम्यान या पावसाचा फटका बळीराजाला मोठ्या प्रमाणात बसला असून शासनाने तात्काळ पंचनामे करून नुकसान भरपाई द्यावी, अशी अपेक्षा शेतकरी वर्गातून केली जात आहे.
अशातच, माजी मंत्री आणि भूम परंडा विधानसभा मतदारसंघाचे (Bhum Paranda Assembly Constituency) आमदार तानाजी सावंत (Tanaji Sawant) यांनी त्यांचा मतदारसंघातील शेती नुकसानीच्या पंचनाम्याचे आदेश दिलेत. एकही गाव सुटता कामा नये, सरसकट पंचनामे करा, असे म्हणत पुण्यातून परंड्यातील तहसीलदारांना फोनवर त्यांनी हे आदेश दिले आहेत. तानाजी सावंत तहसीलदार यांना फोनवरून सूचना करत असलेला एक व्हिडिओ सध्या सोशल मीडियावर सावंत समर्थकांकडून वायरल केला जात आहे.
मुख्यमंत्री आणि उपमुख्यमंत्र्यांना आम्ही मदतीबाबत बोलू
पावसामुळे अडचणीत सापडलेल्या शेतकऱ्यांच्या नुकसानीचे सरसकट पंचनामे करा, एकही गट, गण, गाव वगळू नका. मुख्यमंत्री आणि उपमुख्यमंत्री यांना आम्ही मदतीबाबत बोलू, तुम्ही पंचनामे करा. असं म्हणत तानाजी सावंत यांनी तहसीलद यांना फोनवरून सूचना केल्या आहेत. मतदारसंघातील शेती नुकसानीच्या पंचनाम्यासंदर्भात सावंतांनी थेट पुण्यातून हे आदेश दिले आहेत.
भर पावसात दुचाकीवर बसून कृषीमंत्री दत्तात्रय भरणे पोहचले शेतकऱ्यांच्या बांध्यावर
दरम्यान, राज्यात झालेल्या मुसळधार पावसामुळे मोठ्या प्रमाणात शेतीचं मोठं नुकसान झालं होतं. त्या पार्श्वभूमीवर आज राज्याचे कृषिमंत्री तथा वाशिमचे पालकमंत्री दत्तात्रय भरणे (Dattatray Bharne) वाशिमच्या (Washim News) दौऱ्यावर आले होते. यावेळी त्यांनी भर पावसात दुचाकीवर बसून शेतकऱ्याच्या बांधावर जाऊन अतिवृष्टीने बाधित झालेल्या शेतीच्या नुकसानाची पाहणी केली. राज्यात अतिवृष्टीचा मोठा तडाखा बसला आहे. यात सर्वाधिक नुकसान नांदेड आणि वाशिम जिल्ह्यात झालं आहे. यात 350 गावांच नुकसान झालं आहे. तर यात 4 लाख 11 हजार एकरच नुकसान झालं आहे. एक-दोन ठिकाणी मनुष्यहानी झाली आहे.
शेतकऱ्यांच्या मदतीसाठी केंद्र सरकारकडे सुद्धा मागणी करणार- दत्तात्रय भरणे
दरम्यान, अतिवृष्टीने नुकसान झालेल्याची पाहणी करण्यासाठी मी आज वाशिम जिल्ह्यात आलो आहे. आज सर्वत्र नुकसानीची पाहणी करून याचा अहवाल मुख्यमंत्री आणि दोन्ही मुख्यमंत्रीं यांना देणार आहे, त्यानंतर ते निर्णय घेऊन मदत देतील. केंद्र सरकारकडे सुद्धा शेतकऱ्यांना मदतीसाठी मागणी करणार आहे. अशी प्रतिक्रिया कृषीमंत्री तथा पालकमंत्री दत्तात्रय भरणे यांनी दिली. वाशिम जिल्ह्यातील अतिवृष्टीने नुकसान झालेल्या रिसोड तालुक्यातील महागाव,बाळखेड, वाकद, शेलू खडसे, मसलापेन त्यानंतर मालेगाव तालुक्यातील राजुरा तर मंगरूळपीर तालुक्यात शेलूबाजार आणि वाशिम इथ भेट देत दत्तात्रय भरणे यांनी पाहणी केली आहे. त्यानंतर ते जिल्ह्यात झालेल्या अतिवृष्टी संदर्भात बैठक घेणार आहेत.
आणखी वाचा
महत्त्वाच्या बातम्या
