OBC Mahaelgar Melava : सांगलीत आज ओबीसी आरक्षण बचाव महाएल्गार मेळावा, सभेआधीच प्रकाश शेंडगेंची मनोज जरांगेंवर जोरदार टीका; म्हणाले...

OBC Mahaelgar Melava : एकीकडे मनोज जरांगे पाटील यांची शांतता रॅली सुरू आहे. तर दुसरीकडे पश्चिम महाराष्ट्रमधीलच सांगली जिल्ह्यात आज दुपारी ओबीसी आरक्षण बचाव महाएल्गार मेळावा पार पडणार आहे.

OBC Mahaelgar Melava

Source : ABP Majha Video Screenshot

सांगली : पश्चिम महाराष्ट्रात एकीकडे मनोज जरांगे पाटील (Manoj Jarange Patil) यांची शांतता रॅली सुरू आहे. तर दुसरीकडे पश्चिम महाराष्ट्रमधीलच सांगली जिल्ह्यात आज दुपारी ओबीसी आरक्षण बचाव महाएल्गार मेळावा (OBC Mahaelgar Melava) पार पडणार आहे.  या मेळाव्यासाठी पश्चिम महाराष्ट्रातून लाखो ओबीसी (OBC) बांधव सहभागी होणार आहेत.

या मेळाव्यास मंत्री छगन भुजबळ (Chhagan Bhujbal), पंकजा मुंडे (Pankaja Munde), प्रकाश शेंडगे (Prakash Shendge),  गोपीचंद पडळकर (Gopichand Padalkar), लक्ष्मण हाके (Laxman Hake) उपस्थित राहणार आहेत. या सभेतून छगन भुजबळ नेमकं काय बोलणार? याकडे आता सर्वांचे लक्ष लागले आहे. 

प्रकाश शेंडगेंची मनोज जरांगेंवर टीका

सांगली येथील तरुण भारत स्टेडियम येथे दुपारी 2 वाजता हा मेळावा सुरू होणार आहे. मनोज जरांगेंची मराठा आरक्षण ओबीसीमधून मिळण्याची मागणी घटनेला धरून नाही. तसेच जरांगे दररोज आपल्या नवनवीन मागण्या बदलत गेल्यामुळे मराठा आंदोलनाची दिशा भरकटली आहे, असे ओबीसी नेते प्रकाश शेंडगे (Prakash Shendge) यांनी म्हटले आहे. तसेच मनोज जरांगेंनी विधानसभेत उमेदवार दिले तर ओबीसी देखील आपली ताकद दाखवून जे ओबीसी आरक्षणाला विरोध करतील त्यांना पाडण्याचं काम करेल आणि याची ट्रायल लोकसभेमध्ये झालेय, असं प्रकाश शेंडगे यांनी म्हटले आहे. आजच्या ओबीसी आरक्षण बचाव महाएल्गार मेळाव्याकडे आता सर्वांचे लक्ष लागले आहे. 

जरांगेंची शांतता रॅली आज पुण्यात

मराठा आरक्षणाच्या मागणीसाठी मराठा आंदोलक मनोज जरांगे (Manoj Jarange) हे राज्यभरात जनजागृती शांतता फेरी काढत आहेत. सोलापूर आणि सांगलीनंतर आज (रविवारी) ही फेरी पुण्यात दाखल होणार आहे. त्या निमित्ताने स्वागताची मोठी तयारी करण्यात आली आहे. मनोज जरांगे-पाटील (Manoj Jarange) यांच्या उपस्थितीत फेरी काढण्यात येणार आहे. यामुळे पुणे शहरातील वाहतूक व्यवस्थेत बदल करण्यात आले आहे. जरांगेंच्या रॅलीच्या पार्श्वभूमीवर शनिपार चौक ते कुमठेकर रस्ता, बेलबाग चौक ते लक्ष्मी रस्ता, केळकर रस्ता, रमणबाग प्रशाला ते अप्पा बळवंत चौक, बुधवार चौक ते अप्पा बळवंत चैाक, जयंतराव टिळक पूल ते शनिवारवाडा, कुंभारवेस चौक ते गाडगीळ पुतळा, मंगला चित्रपटगृह ते प्रीमियर गॅरेज शिवाजी पुतळा चौक ते शिवाजीनगर न्यायालय, रेव्हेन्यू कॉलनी ते मॉडर्न चौक, झाशीची राणी पुतळा चौक ते सावरकर भवन, महात्मा फुले संग्रहालय ते झाशीची राणी पुतळा चौक या मार्गावरील वाहतूक बंद राहणार आहे.

इतर महत्वाच्या बातम्या