Konkan Refinery Project : सर्वेक्षणाला विरोध करणाऱ्या स्थानिकांच्या आंदोलनाची दखल, MIDC चे अधिकारी भेट घेणार
राजापूरमधील शिवणे खुर्द गावच्या सड्यावर काल दुपारी तीन वाजल्यापासून सर्वेक्षणाला सुरुवात झाली होती. याचा विरोध करत नागरिकांनी तिथे ठिय्या मांडला. त्यांच्या आंदोलनाची आता प्रशासनाने दखल घेतली आहे.
Konkan Refinery Project : कोकणातील रिफायनरी कामादरम्यान राजपूर तालुक्यातील शिवणे खुर्द गावात झालेल्या आंदोलनाची प्रशासनाने दखल घेतली आहे. एमआयडीसीचे रत्नागिरी, सिंधुदुर्ग जिल्ह्याचे RM आंदोलकांची भेट घेण्यासाठी येणार आहे. याची माहिती आंदोलन, स्थानिकांनी 'एबीपी माझा'ला दिली. सकाळी दहा वाजता एमआयडीसीचे अधिकारी भेट घेणार आहेत. अधिकारी भेटून, चर्चा करुन प्रश्नांची उत्तरं देत नाही तोपर्यंत माघार न घेण्यावर ग्रामस्थ ठाम आहेत. शासन, स्थानिक प्रशासन विश्वासात न घेता रिफायनरी संबंधित काम करत असल्याने नागरिकांचा रोष वाढला आणि त्यांनी ठिय्या मांडला होता.
रिफायनरीच्या मुद्यावरुन विरोधक आक्रमक झाले आहेत. राजापूर तालुक्यामधील शिवणे खुर्द गावच्या सड्यावर बुधवारी (8 जून) दुपारी तीन वाजल्यापासून सर्वेक्षणाच्या कामाला सुरुवात झाली होती. गावात माती परीक्षण, ड्रोनमार्फत सर्व्हे केला जात होता. याची माहिती मिळाल्यानंतर शिवणे खुर्दच्या सड्यावर येत नागरिकांनी ठिय्या मांडला. जवळपास 600 नागरिक सर्वेक्षण विरोधातील आंदोलनात सहभागी झाले होते. यामध्ये महिला पुरुष, तरुण वृद्ध यांचा समावेश सुरु होता.
काल दुपारी तीन वाजता सुरु झालेलं ठिय्या आंदोलन पहाटेपर्यंत सुरु होतं. नागरिकांनी काळ्या कुट्ट अंधारात उघड्या माळरानावर आंदोलनाचा पवित्रा घेतला. पाऊस, थंडी, वारा याची तमा न बाळगता रिफायनरी विरोधी मोठ्या संख्येने ठिय्या आंदोलनात सहभागी झाले होते. शासन, प्रशासन ठोस उत्तर देत नाही तोपर्यंत माघार नाही, अशी भूमिका त्यांनी घेतली होती. अखेर नागरिकांचा विरोध पाहता प्रशासनाने दखल घेतली. आज सकाळी एमआयडीसीचे अधिकारी आंदोलकांची भेट घेणार आहेत.
संबंधित बातम्या
महत्त्वाच्या बातम्या
