Jejuri Somavati Yatra : जेजुरीमध्ये श्री खंडोबाची सोमवती यात्रा; 13 नोव्हेंबर रोजी वाहतूक व्यवस्थेत बदल
Pune Traffic News : जेजुरी येथील सोमवती यात्रेच्या निमित्ताने 13 नोव्हेंबर रोजी वाहतूक व्यवस्थेत बदल करण्यात आला आहे.
पुणे : पुरंदर तालुक्यातील जेजुरी (Jejuri News) येथे 13 नोव्हेंबर रोजी श्री खंडोबा (Shree Khandoba) देवाच्या सोमवती यात्रेच्या (Somavati Yatra) अनुषंगाने वाहतूक कोंडी होऊ नये तसेच कायदा व सुव्यवस्था अबाधित राहावी म्हणून वाहतूकीत बदल करण्यात आल्याचे आदेश जिल्हाधिकारी डॉ. राजेश देशमुख यांनी जारी केले आहेत.
वाहतूक कोंडी होऊ नये म्हणून 13 नोव्हेंबर रोजी पहाटे 5 वाजेपासून ते रात्री 10 वाजेपर्यंत पुणे ते पंढरपूर राष्ट्रीय महामार्ग क्र. 965 आणि पुणे ते बारामती या मार्गावरील जड, अवजड व इतर वाहतूक बंद करुन अन्य पर्यायी मार्गाने वळविण्यात येणार असल्याची माहिती प्रशासनाच्यावतीने देण्यात आली आहे.
जेजुरी पोलीस स्टेशन, पुणे ग्रामीण हद्दीतील वाहतूक बदल:
सातारा, फलटण, लोणंद, बारामती येथून पुणे येथे जाण्याकरीता जेजुरी-सासवडकडे येणारी जड, अवजड वाहनांची वाहतूक पुर्णपणे बंद करुन त्यावरील वाहने निरा-मोरगाव-सुपा ते केडगाव चौफुला मार्गे सोलापुर महामार्ग क्रमांक 65 वरुन पुणे यामार्गाने वळविण्यात येत आहे.
पुण्याकडून बारामतीकडे येणारी वाहतूक
बेलसर-कोथळे-नाझरे-सुपे-मोरगाव रोड मार्ग बारामती या मार्गे वळविण्यात येत आहे.
वडगाव निंबाळकर पोलीस स्टेशन, पुणे ग्रामीण हद्दीतील वाहतूक बदल:
बारामती व निरा बाजूकडून जेजुरी मार्गे पुणे बाजूकडे जाणारी जड, अवजड वाहनांची वाहतूक पुर्णपणे बंद करुन ती मोरगाव-सुपा-केडगाव चौफुला मार्गे सोलापुर महामार्ग क्रमांक 65 वरुन पुणे या मार्गे वळविण्यात येत आहे.
सासवड पोलीस स्टेशन, पुणे ग्रामीण हद्दीतील वाहतूक बदल :
पुणे बाजुकडून जेजुरी मार्गे फलटण-सातारा बाजुकडे जाणारी जड, अवजड वाहनांची वाहतूक पूर्णपणे बंद करुन सासवड-नारायणपुर-कापुरहोळ मार्गे सातारा-फलटण किंवा सासवड-वीर फाटा-परींचे-वीर-वाठार मार्गे लोणंद या मागे वळविण्यात येत आहे.
वाहतूकीस लावलेले निर्बंध 13 नोव्हेंबर रोजीच्या 'श्री खंडोबा देवाची सोमवती यात्रे'करीता येणाऱ्या हलक्या वाहनांसाठी शिथील राहतील. नागरिकांनी वाहतूकीत केलेल्या बदलाची नोंद घेवून सहकार्य करावे, असे आवाहनही प्रशासनाकडून करण्यात आले आहे.
महत्त्वाच्या बातम्या
