चिकन दिलं नाही म्हणून दुकानदाराला मारहाण, चाकूनेही हल्ला, कोंढव्यातील घटनेने खळबळ!

कोंढव्यात धक्कादायक घटना घडली आहे. पार्टी करण्यासाठी चिकन दिलं नाही, म्हणून चक्क दुकानदाराला भोकसल्याची घटना घडली आहे. सुफियान आयुब शेख असं मारहाण करत दुकानदारास चाकूने भोकसणाऱ्या आरोपीचं नाव आहे.

Crime

Source : abp live

Pune Pimpri Chinchwad Crime News : नव्या वर्षाला सुरुवात झाली पण पुण्यातील (Pune News) गुन्हेगारी कृत्य (Pune Crime News) काही कमी व्हायची नाव घेत नाहीत. पुण्यातील विविध भागात जीवघेणं हल्ले सुरुच आहेत, त्याशिवाय काही भागात कोयाता गँगची (koyta gang) दहशत आहेच. तर अनेक ठिकाणी गाड्यांची तोडफोड केली जातेय. अशातच कोंढव्यात धक्कादायक घटना घडली आहे. पार्टी करण्यासाठी चिकन दिलं नाही, म्हणून चक्क दुकानदाराला भोकसल्याची घटना घडली आहे. सुफियान आयुब शेख असं मारहाण करत दुकानदारास चाकूने भोकसणाऱ्या आरोपीचं नाव आहे. तर अब्दुला शेख असं हल्ला झालेल्या दुकानदाराचे नाव आहे. 

पार्टी करण्यासाठी चिकन दिलं नाही, म्हणून चिकन दुकानदाराला चाकूने भोकसल्याची घटना पुण्यातील कोंढवा परिसरात घडली आहे. सुफियान आयुब शेख असं आरोपीचं नाव आहे. हा प्रकार सोमवारी (दि.1) रात्री अकराच्या सुमारास मिठानगर येथील आयशा चिकन नावाच्या दुकानात घडला आहे. 23 वर्षीय अब्दुला हाशिम शेख याने याबाबत कोंढवा पोलिसात (Kondhwa Police Station) तक्रार दिली.

याबाबत अब्दुला हाशिम शेख याच्या तक्रारीनंतर कोंढवा पोलीस ठाण्यात सुफियान अय्युब शेख याच्यावर गुन्हा दाखल केलाय. पोलिसांनी आयपीसी 323, 324 नुसार गुन्हा (FIR) दाखल केला आहे. या प्रकरणाबाबत पोलिसांनी दिलेल्या माहितीनुसार, फिर्यादी अब्दुला शेख याचे कोंढव्यातील मिठानगर येथे आयशा चिकन सेंटर नावाचे दुकान आहे. एक जानेवारी रोजी म्हणजेच सोमवारी रात्री अकराच्या सुमारास दुकान अब्दुला शेख बंद करत होता. दुकानदाराच्या तोंड ओळखीचा सुफियान शेख त्यावेळी दुकानात आला. सुफियान याने त्याच्याकडे चिकन मागितले. पण अब्दुलाने त्याला नाही म्हणून सांगितले.  दुकान बंद करत आहे, चिकन मिळणार नाही असे अब्दुलाने सुफियान याला सांगितले. पण हाच राग सुफियान याला आला. सुफियान याने अब्दुला याला मारहाण करत जाब विचारला. अब्दुला याच्या कानाखालीही लगावली. सुफियान इतक्यावरच थांबला नाही, त्याने दुकानातील चाकू अब्दुला शेख याच्या डोक्यात मारुन गंभीर जखमी केले.

या घटनेमुळे परिसरात खळबळ उडाली आहे. काहीसं दहशतीचं वातावरण निर्माण झालं आहे. कोंढवा पोलिस या प्रकरणाचा पुढील तपास करीत आहेत. आरोपी सुफियाना फरार असून पोलिस त्याचा शोध घेत आहेत. अब्दुला याच्यावर प्रथमिक उपचार सुरु आहेत.