Vinod Tawde: माझी चूक झाली, सोडवा...; विनोद तावडेंचे 25 फोन; हितेंद्र ठाकूरांच्या दाव्यानं खळबळ, नालासोपारामध्ये राडा
Vinod Tawde in Virar: नालासोपारा येथे पैसे वाटपाच्या आरोपावरुन भाजप आणि बहुजन विकास आघाडीमध्ये तुफान राडा झाला.
Vinod Tawde in Virar Maharashtra Vidhan Sabha Election 2024: नालासोपारा येथे पैसे वाटपाच्या आरोपावरुन भाजप आणि बहुजन विकास आघाडीमध्ये तुफान राडा झाल्याचा व्हिडीओ समोर आला आहे. भाजप केंद्रीय नेते विनोद तावडे यांच्यासह भाजप नालासोपारा विधानसभेचे उमेदवार राजन नाईक यांना हॉटेलमध्ये घेरून दोन्ही गटात तुफान राडा झाल्याचं व्हिडीओमधून स्पष्ट होत आहे. विरार पूर्व मनवेलपाडा येथील विवांत होटलमध्ये हा राडा झाला.यावेळी क्षितिज ठाकूरही घटनास्थळी उपस्थित होते. यावेळी दोन्ही बाजूंनी एकमेकांविरुद्ध घोषणाबाजी सुरु होती.
सदर घटनेवर हितेंद्र ठाकूर काय म्हणाले?
5 कोटी रुपये घेऊन विनोद तावडे आले होते. तसेच दोन डायऱ्या देखील सापडल्या आहेत. यामध्ये पैशांचं वाटप कसं केलं, याची माहिती होती. याबाबत सदर ठिकाणी पोलीस पोहचले आहेत. आम्ही तक्रार केली आहे. परंतु पुढे काय होणार या तक्रारीचं हे माहिती आहे. याचं सरकार आहे, असं हितेंद्र ठाकूर यांनी सांगितले. त्याचप्रमाणे मला विनोद तावडे मला सारखे फोन करतायत. मला सोडवा..माझी चूक झाली..मला सोडवा, अशी विनंती विनोद तावडे करत आहेत. विनोद तावडे यांनी मला 25 फोन केले आहेत, असा दावा हितेंद्र ठाकूर यांनी एबीपी माझाशी बोलताना केला आहे.
अतुल भातखळकर काय म्हणाले?
पराभव समोर दिसत असल्यामुळे विरोधक असे आरोप करत आहेत, असं भाजपचे नेते अतुल भातखळकर यांनी सांगितले. तुम्ही रडीचा डाव खेळू नका, लोकशाही आहे, सामोरे जावा. तसेच सदर प्रकरणाबाबत पोलीस स्थानकांत तक्रार दाखल करा, असं अतुल भातखळकर हितेंद्र ठाकूर यांना म्हणाले.
सुधीर मुनगंटीवार काय म्हणाले?
नालासोपाऱ्यामधील या घटनेवर भाजपचे नेते सुधीर मुनगंटीवार यांनी प्रतिक्रिया दिली आहे. उद्या जर आरोप केला की, शरद पवार पैसे वाटताय, उद्धव ठाकरे पैसे वाटताय, विनोद तावडे पैसे वाटताय, मग आपण विश्वास तरी ठेऊ का?, विनोद तावडे खूप मोठे नेतृत्व आहे. विनोद तावडे लक्ष्मण रेषा न ओलांडणारं नेतृत्व आहे, असं सुधीर मुनगंटीवार यांनी सांगितले. कोणत्या स्थरावरचे नेते आहेत, ते पैसे वाटतील का?, असा सवाल सुधीर मुनगंटीवार यांनी उपस्थित केला.
नेमकं काय घडलं?
बविआच्या आरोपानुसार, विनोद तावडे हे मंगळवारी विरार पूर्वेला असणाऱ्या मनोरीपाडा येथील विवांत हॉटेलमध्ये आले होते. त्यावेळी भाजपचे उमेदवार राजन नाईक आणि भाजपचे काही पदाधिकारी हॉटेलमध्ये आले होते. त्यांच्यात बैठक सुरु होती. त्यावेळी बविआचे काही कार्यकर्ते हॉटेलमध्ये आले. याठिकाणी पैसेवाटप सुरु असल्याचा आरोप बविआच्या कार्यकर्त्यांनी केला. या राड्यानंतर पोलीस घटनास्थळी आले आणि त्यांनी परिस्थिती नियंत्रणात आणली. यावेळी क्षितिज ठाकूरही घटनास्थळी उपस्थित होते. यावेळी दोन्ही बाजूंनी एकमेकांविरुद्ध घोषणाबाजी सुरु होती.
विरारमध्ये विनोद तावडे यांनी पैसे वाटत असल्याचा बविआचा आरोप, VIDEO:
महत्त्वाच्या बातम्या
ट्रेंडिंग न्यूज
