Pune Crime Rave Party : प्रांजल खेवलकरांच्या लॅपटॉपमधील फोटो अन् माहिती लीक, एकनाथ खडसेंच्या आरोपावर पुणे पोलिसांचं उत्तर; आयुक्त म्हणाले...
Pune Crime Rave Party : एकनाथ खडसे यांनी पत्रकार परिषद घेत पुणे पोलिसांच्या कार्यपद्धतीवर गंभीर प्रश्न उपस्थित केले होते.
Pune Crime Rave Party : पुण्यातील रेव्ह पार्टीवर 27 जुलै रोजी पोलिसांनी टाकलेल्या छाप्यात राष्ट्रवादी शरद पवार गटाचे ज्येष्ठ नेते एकनाथ खडसे (Eknath Khadse) यांचे जावई आणि राष्ट्रवादी शरद पवार गटाच्या महिला प्रदेशाध्यक्ष रोहिणी खडसे (Rohini Khadse) यांचे पती प्रांजल खेवलकर (Pranjal Khewalkar) यांना अटक करण्यात आली आहे. या प्रकरणातील सर्व आरोपींना दोन दिवसांची पोलीस कोठडी सुनावण्यात आली आहे. दरम्यान, आज एकनाथ खडसे यांनी पत्रकार परिषद घेऊन पुणे पोलिसांच्या कार्यपद्धतीवर गंभीर प्रश्न उपस्थित केले. "माझ्या जावयाच्या लॅपटॉपमधील फोटो आणि माहिती जळगावच्या आमदाराकडे कशी पोहोचली?" असा थेट सवाल त्यांनी केला. "पोलिसांनी खाजगी ठिकाणी असलेल्या लोकांचे व्हिडीओ शूट करुन ते माध्यमांना पुरवले. हा बदनामी करण्याचा प्रयत्न आहे", असा आरोप देखील त्यांनी केला. तर एकनाथ खडसे हे पुणे पोलिसांविरोधात बदनामीचा दावा दाखल करणार आहेत. आता एकनाथ खडसे यांच्या आरोपावर पुणे पोलिसांनी उत्तर दिले आहे.
काय म्हणाले पोलीस आयुक्त?
एकनाथ खडसे यांच्या आरोपावर पुणे पोलीस आयुक्त अमितेश कुमार म्हणाले की, जी कारवाई झाली आहे, त्याची विस्तृत माहिती दिलेली आहे. या प्रकरणात पारदर्शक आणि कायदेशीर कारवाई होईल. कोणीही पोलीस दलावर शंका ठेवायची गरज नाही. कोणत्याही प्रकारचे फोटो, व्हिडिओ पोलिसांकडून लीक झालेले नाहीत. पोलीस ठाण्याच्या आतमध्ये सुद्धा रेकॉर्डिंगला बंदी घालता येत नाही. आम्ही काही लीक करत नाही. जे व्हिडिओ रेकॉर्डिंग करत असतील त्याला आम्ही थांबवू शकत नाही. कोणतेही फोटो आणि व्हिडिओ पोलिसांकडून लीक झालेले नाहीत, असे स्पष्टीकरण त्यांनी दिले आहे.
पत्रकार परिषदेत काय म्हणाले एकनाथ खडसे?
एकनाथ खडसे यांनी म्हटले होते की, मला पोलिसांना विचारायचे आहे की, याला रेव्ह पार्टी म्हणायचे का? रेव्ह पार्टीची व्याख्या काय? पोलीस बदनामी करतायत. तिथे ना डान्स ना म्युझिक आहे. पोलिसांनी खाजगी ठिकाणी असलेल्या लोकांचे व्हिडीओ शूट करुन ते माध्यमांना पुरवले. हा बदनामी करण्याचा प्रयत्न आहे. मी कोणत्या मंत्री किंवा मुख्यमंत्र्यांवर आता आरोप करणार नाही. पण, पोलीस कोणाच्या सांगण्यावरुन काम करतायेत, असे वाटते. जळगावच्या आमदाराकडे माझ्या जावयाच्या लॅपटॉपमधील फोटो आणि माहिती कशी जाते? मी पुणे पोलिसांच्या विरोधात बदनामीचा दावा दाखल करणार आहे, असे त्यांनी म्हटले आहे.
आणखी वाचा
महत्त्वाच्या बातम्या
