Nilesh Ghaywal: निलेश घायवळच्या घरच्या झडतीत सापडला 'ॲम्युनेशन बॉक्स'; फॅक्टरीशी पोलिसांचा पत्रव्यवहार, घरात बॉक्स रिकामाच पडलेला, काडतुसे गेली कुठे...? पोलिसांचा शोध सुरू
Nilesh Ghaywal: घराच्या झडतीमध्ये एक ॲम्युनेशन बॉक्स (बंदुकीच्या गोळ्या ठेवण्याचा बॉक्स) आढळून आला आहे. हा बॉक्स रिकामा असला तरी तो बॉक्स निलेश घायवळला कसा मिळाला याचा तपास पुणे पोलिसांकडून केला जात आहे.
पुणे : पुण्यातील कोथरूड गोळीबार प्रकरणात चर्चेत आलेला गुंड निलेश घायवळ (Nilesh Ghaywal) याच्यावर पुणे पोलिसांकडून आतापर्यंत वेगवेगळ्या गंभीर प्रकाराचे दहा गुन्हे दाखल करण्यात आल्याची माहिती आता समोर आली आहे. पोलिसांकडून निलेशची (Nilesh Ghaywal) आर्थिक बाजू कमकुवत करण्यासाठी प्रयत्न सुरू केले आहेत. कोथरूड परिसरातील पोलिसांनी (Pune Police) घेतलेल्या त्याच्या घराच्या झडतीत दोन काडतुसे तसेच चार पुंगळ्या जप्त केल्या होत्या. याप्रकरणी घायवळविरोधात (Nilesh Ghaywal) कोथरूड पोलिस ठाण्यात गुन्हादेखील दाखल करण्यात आला आहे. दरम्यान, त्याच्या घराच्या झडतीमध्ये एक ॲम्युनेशन बॉक्स (बंदुकीच्या गोळ्या ठेवण्याचा बॉक्स) आढळून आला आहे. हा बॉक्स रिकामा असला तरी तो बॉक्स निलेश घायवळला कसा मिळाला याचा तपास पुणे पोलिसांकडून (Pune Police) केला जात आहे.
Ammunition box found: पिस्तुलाच्या गोळ्या ठेवण्यासाठी बॉक्स असल्याचे पोलिसांना स्पष्ट झाले
मकोका अंतर्गत कारवाई करण्यात आलेला गुंड निलेश घायवळ सध्या स्वीत्झर्लंडलमध्ये आहे. त्याने घायवळऐवजी गायवळ नावाचा वापर करत पासपोर्ट मिळवला असल्याचे यापूर्वीच पोलिस तपासात समोर आले आहे. सोमवारी तारीख. ६ रोजी पोलिसांनी घेतलेल्या घरझडतीमध्ये त्याच्या घरातील तिसऱ्या मजल्यावर असलेल्या जिन्यात इन्व्हर्टरचा एक लोखंडी बॉक्स होता. पोलिसांनी (Pune Police) तो बॉक्स उघडून बघितला असता त्यात इन्व्हर्टरच्या मागे एक लोखंडी बॉक्स आढळला. तो बॉक्स खाली काढून बघितला असता, पिस्तुलाच्या गोळ्या ठेवण्यासाठी बॉक्स असल्याचे पोलिसांना स्पष्ट झाले. त्या बॉक्सवर २०१७ वर्षाचा उल्लेख असून, ५.५६ एमएम असे लिहिलेले आहे.
Ammunition box found: घरात बॉक्स रिकामाच पडलेला, काडतुसे गेली कुठे...?
पोलिसांना बॉक्स मिळाला तेव्हा त्यात एक सत्तूर (मोठा सुरा) पोलिसांना सापडला होता. त्या व्यतिरिक्त बॉक्समध्ये एकही काडतूस आढळलेले नाही. संबंधित बॉक्समध्ये ३०० काडतुसे बसण्याची जागा असते. त्यामुळे त्यातील काडतुसे कुठे गेली, हा प्रश्न देखील उपस्थित होत आहे.
Ammunition box found: कुणाला दिला याचा रेकॉर्डदेखील मागवण्यात आला
पोलिसांनी खडकी येथील ॲम्युनेश फॅक्टरीसोबत या प्रकरणात पत्रव्यवहार केला असून, हा बॉक्स नेमका कोणत्या ॲम्युनेश फॅक्टरीतून बाहेर आला आहे. याबाबत माहिती विचारण्यात आली आहे. तसेच बॉक्स फॅक्टरीबाहेर कसा आला, कुणाला दिला याचा रेकॉर्डदेखील मागवण्यात आला आहे. या प्रकरणी आणखी निलेश घायवळच्या अडचणी वाढण्याची शक्यता वर्तवली जातेय.
महत्त्वाच्या बातम्या
