Pune News: राष्ट्रवादी अजित पवार गटाचे राजेंद्र हगवणे यांच्या सुनेने उचललं टोकाचं पाऊल; हुंड्यासाठी छळ केल्याची माहेरच्यांची तक्रार, पुण्यातील घटनेने खळबळ
Pune News: वैष्णवी यांना रुग्णालयात दाखल करण्यात आले. मात्र, उपचारापूर्वीच त्यांचा मृत्यू झाल्याचे डॉक्टरांनी घोषित केले. पुण्यातील ससून रुग्णालयात शवविच्छेदन करण्यात आले.
पुणे: उपमुख्यमंत्री अजित पवार यांच्या राष्ट्रवादी काँग्रेसचे (NCP) नेते राजेंद्र हगवणे (Rajendra Hagawane) यांची सून वैष्णवी शशांक हगवणे (वय वर्षे 23) यांनी मुळशी तालुक्यातील भुकूम येथे शुक्रवारी (दि. 16 मे) दुपारी साडेचारच्या सुमारास गळफास घेऊन आत्महत्या केल्याची धक्कादायक माहिती समोर आली आहे. सासरच्या मंडळींनी हुंड्यासाठी मानसिक आणि शारीरिक छळ केल्याने वैष्णवी यांनी टोकाचे पाऊल उचलल्याचा आरोप त्यांच्या माहेरच्यांनी केला आहे. याप्रकरणी बावधन पोलिस ठाण्यात गुन्हा दाखल झाला आहे.
हुंड्यासाठी मानसिक, शारीरिक छळ
वैष्णवी हगवणे यांच्या सासरच्या मंडळींनी हुंड्यासाठी मानसिक, शारीरिक छळ करून क्रूर वागणूक दिल्यानेच त्यांनी आत्महत्या केल्याची तक्रार पोलिसांत करण्यात आली आहे. वैष्णवी यांचे वडील आनंद ऊर्फ अनिल साहेबराव कस्पटे (51, रा. कस्पटे वस्ती, वाकड) यांनी याप्रकरणी काल (शनिवारी) बावधन पोलिस ठाण्यात फिर्याद दिली आहे. त्यानुसार वैष्णवीचा पती शशांक राजेंद्र हगवणे, सासू लता राजेंद्र हगवणे, सासरा राजेंद्र तुकाराम हगवणे, नणंद करिश्मा राजेंद्र हगवणे, दीर सुशील राजेंद्र हगवणे यांच्या विरोधात पोलिसांनी गुन्हा दाखल केला आहे. पती, सासू, नणंद यांना अटक केली.
घरात बेडरूमचा दरवाजा आतून बंद...
पोलिसांच्या माहितीनुसार, वैष्णवी हगवणे यांनी शुक्रवारी घरात बेडरूमचा दरवाजा आतून बंद करून गळफास घेतला. काही वेळानंतर पती शशांक यांनी दरवाजा वाजवला. मात्र, दरवाजा न उघडल्याने त्यांनी तो दरवाजा तोडला. त्यानंतर ही घटना समोर आली. वैष्णवी यांना रुग्णालयात दाखल करण्यात आले. मात्र, उपचारापूर्वीच त्यांचा मृत्यू झाल्याचे डॉक्टरांनी घोषित केले. पुण्यातील ससून रुग्णालयात शवविच्छेदन करण्यात आले.
दरम्यान, वैष्णवी यांचे वडील आनंद कस्पटे यांनी दिलेल्या फिर्यादीत नमूद आहे की, वैष्णवीचा पती, सासू-सासरे, नणंद आणि दीर यांनी हुंड्यासाठी मानसिक, शारीरिक छळ करून क्रूर वागणूक दिली. मारहाण व जाच करून तिच्या मृत्यूस ते कारणीभूत ठरले आहेत. या घटनेने परिसरात खळबळ उडाली असून पोलीस तपास करत आहेत. राजेंद्र हगवणे हे राष्ट्रवादी काँग्रेस अजितदादा पवार यांच्या पक्षाचे पदाधिकारी आहेत. त्यांच्यावर गुन्हा दाखल झाल्याने एकच खळबळ उडाली आहे.
महत्त्वाच्या बातम्या
