Maharashtra Legislative Council Election 2024: कोकण पदवीधर मतदारसंघाचे उमेदवार अभिजीत पानसेंनी घेतली एकनाथ शिंदे यांची भेट; महायुतीचा पाठिंबा?, चर्चांना उधाण
Maharashtra Legislative Council Election 2024: मनसेचे अभिजीत पानसे यांना कोकण पदवीधर मतदारसंघातून उमेदवारी जाहीर केल्यानंतर विविध चर्चांना उधाण आले आहे.
Maharashtra Legislative Council Election 2024: मुंबई: महाराष्ट्र नवनिर्माण सेनेकडून (MNS) कोकण पदवीधर निवडणूकीसाठी उमेदवार रिंगणात उतरवला आहे. कोकण पदवीधर मतदारसंघातून मनसेने अभिजीत पानसे (Abhijeet Panse) यांना उमेदवारी जाहीर केली आहे. राज ठाकरेंच्या या खेळीमुळे भाजपची चांगलीच गोची झाल्याचे सांगण्यात येत आहे. (Maharashtra Legislative Council Election)
मनसेचे अभिजीत पानसे यांना उमेदवारी जाहीर केल्यानंतर विविध चर्चांना उधाण आले आहे. तसेच अभिजीत पानसे महायुतीचे उमेदवार आहेत की मनसेचे?, असे सवाल उपस्थित करण्यात येत आहे. याचदरम्यान अभिजीत पानसे यांनी राज्याचे मुख्यमंत्री एकनाथ शिंदे यांची भेट घेतली. अभिजीत पानसे आणि मनसेचे खेडमधील नेते वैभव खेडेकर यांनी आज वर्षा निवास्थानी महाराष्ट्राचे मुख्यमंत्री एकनाथ शिंदे (CM Eknath Shinde) यांची सदिच्छा भेट घेतली. या भेटीत नेमकी काय चर्चा झाली?, मनसेच्या अभिजीत पानसे यांना एकनाथ शिंदे पाठिंबा देणार का?, हे पाहणं महत्वाचं ठरणार आहे.
राज ठाकरेंच्या खेळीने भाजपची गोची
मनसेप्रमुख राज ठाकरे यांनी कोकण पदवीधर मतदारसंघासाठी अभिजीत पानसे यांच्या उमेदवाराची घोषणा केली. कोकण पदवीधर हा भाजपचा पारंपारिक मतदारसंघ समजला जातो आणि याच मतदारसंघात निरंजन डावखरे हे भाजपचे विद्यमान आमदार आहेत. मात्र, आता राज ठाकरे यांनी याठिकाणी उमेदवार देऊन पाचर मारुन ठेवली आहे. भाजपसाठी राज ठाकरे अतिशय महत्त्वाचे असल्याने आता त्यांना निवडणुकीतून माघार घ्यायला कशी सांगायची, हा प्रश्न भाजप नेत्यांपुढे आहे.
विधानपरिषद निवडणुकीसाठी महायुतीची खलबतं
विधान परिषदेच्या चार जागांसाठी महायुतीमधील पक्षांमध्ये मंगळवारी चर्चा होण्याची शक्यता आहे. दोन दिवसांत चारही जागांवर महायुतीकडून नावांची घोषणा होऊ शकते, अशी माहिती उच्चपदस्थ सुत्रांनी दिली आहे. राज ठाकरे यांनी कोकण पदवीधर मतदारसंघात आपला उमेदवार जाहीर केला आहे. त्यामुळे विधान परिषदेमध्ये महायुती मनसेला मदत करणार का? याकडे राजकीय वर्तुळाचे लक्ष लागले आहे. मुख्यमंत्री एकनाथ शिंदे व उपमुख्यमंत्री देवेंद्र फडणवीस यांची सह्याद्रीवर बैठक होण्याची शक्यता आहे. या बैठकीत काय निर्णय होतो, याकडे सर्वांच्या नजरा लागल्या आहेत.
26 जूनला पदवीधर निवडणुकीसाठी मतदान-
लोकसभा निवडणुकीचा सहावा टप्पा पार पडला असून 4 जूनला लागणाऱ्या निकालाकडे सर्वांचे लक्ष आहे. पण त्यानंतर,राज्यात, शिक्षक, पदवीधर निवडणुकीसाठी येत्या 26 जून रोजी मतदान होणार आहे. तर 1 जुलैला मतमोजणी होणार आहे. महाराष्ट्रात विधानसभा निवडणुकीच्या पार्श्वभूमीवर निवडणुकांचे पडघम सध्या राज्यात वाजू लागलेले आहेत. उमेदवारी मिळण्यापासून विविध चर्चांना सध्या उधाण आलेलं आहे.
महत्त्वाच्या बातम्या
