भुजबळांसाठी जेलमध्ये टीव्ही, चिकन मसाला आणि वोडकाची सोय: दमानिया

मुंबई: बेहिशेबी मालमत्ता प्रकरणी आर्थर रोड कारागृहात असलेले माजी उपमुख्यमंत्री छगन भुजबळांना व्हीआयपी ट्रिटमेंट मिळत असल्याचा आरोप सामाजिक कार्यकर्त्या अंजली दमानिया यांनी केला आहे. छगन भुजबळ आणि समीर भुजबळ आर्थर रोड कारागृहात टिव्हीवर हिंदी चित्रपट पाहतात. त्यांना चिकन मसाला यासारखे पदार्थ पुरवले जातात. एवढंच नव्हे, तर समीर भुजबळांना वोडका ही दारू देखील नारळपाण्यातून दिली जाते. असा आरोप अंजली दमानियांनी केला आहे. अतिरिक्त कारागृह संचालक भुषणकुमार उपाध्याय यांना लिहिलेल्या पत्रात अंजली दमानियांनी हे खळबळजनक आरोप केले आहेत. दरम्यान, याबाबत एबीपी माझाशी बोलताना अंजली दमानिया म्हणाल्या की, ‘जेलमध्ये काम करणाऱ्या लोकांनी मला याबाबत माहिती दिल्यानंतर मी याप्रकरणी कारागृह अधीक्षकांना पत्र लिहलं. जवळजवळ जानेवारीपासून हा सर्व प्रकार सुरु आहे.’ याशिवाय भुजबळांना कोर्टात हजर करताना नियम धाब्यावर बसवून अनेक लोक त्यांना भेटतात असा आरोपही दमानियांनी केला आहे. त्याशिवाय जे.जे. रुग्णालयाचे अधिष्ठाता तात्याराव लहाने यांच्या भूमिकेवरही दमानियांनी प्रश्नचिन्ह उपस्थित केले आहेत.